ଇସ୍ଲାମାବାଦ: ପାକିସ୍ତାନରେ ଲଗାତାର ତୃତୀୟ ଦିନ ଆତଙ୍କବାଦୀ ଆକ୍ରମଣ ହୋଇଛି। ରବିବାର ପାକିସ୍ତାନର ଡେରା ଇସ୍ମାଇଲ ଖାନରେ ଆତଙ୍କବାଦୀ ଆକ୍ରମଣ ହୋଇଛି। ଏଥିରେ ଜଣେ ପୁଲିସ କର୍ମୀ ଆହତ ହୋଇଥିବା ଖବର ମିଳିଛି। ପାକିସ୍ତାନର ଏଆରୱାଇ ନ୍ୟୁଜର ସୂଚନା ଅନୁଯାୟୀ, ପୁଲିସ ଅଧିକାରୀ କହିଛନ୍ତି ଯେ, ଡେରା ଇସ୍ମାଇଲ ଖାନରେ ଟ୍ୟାଙ୍କର ଗୁଲ ଇମାମ ଅଞ୍ଚଳରେ ଆତଙ୍କବାଦୀମାନେ ଏକ ପୁଲିସ ଚେକ୍ ପୋଷ୍ଟ ଉପରେ ଆକ୍ରମଣ କରିଛନ୍ତି। ଆକ୍ରମଣରେ ଆହତ ହୋଇଥିବା ପୁଲିସ କର୍ମୀଙ୍କ ନାମ ୱହିଦ ଗୁଲ ବୋଲି କୁହାଯାଉଛି। ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ପ୍ରାରମ୍ଭିକ ଅନୁସନ୍ଧାନରେ ଏହି ଆକ୍ରମଣରେ ବ୍ୟବହୃତ ବିସ୍ଫୋରକ ସାମଗ୍ରୀ ଚିହ୍ନଟ ହୋଇପାରିନାହିଁ।
ସୂଚନାଯୋଗ୍ୟ, ଶନିବାର ସକାଳେ ପଞ୍ଜାବ ପ୍ରଦେଶର ମିଆଁୱାଲି ଏୟାରବେସରେ ମଧ୍ୟ ଆତଙ୍କବାଦୀ ଆକ୍ରମଣ ହୋଇଥିଲା। ଏଥିରେ ଏୟାରବେସର ବହୁ କ୍ଷତି ଘଟିଥିଲା। ସେହିପରି ଶୁକ୍ରବାର ପାକିସ୍ତାନର ଗ୍ୱାଦର ଜିଲାରେ ସୁରକ୍ଷା ବାହିନୀଙ୍କ ଗାଡ଼ି ଉପରକୁ ଆକ୍ରମଣ କରାଯାଇଥିଲା। ଏଥିରେ ୧୪ ଜଣ ପାକିସ୍ତାନୀ ସୈନିକଙ୍କ ମୃତ୍ୟୁ ଘଟିଥିଲା।
Comments are closed.