କାମାକ୍ଷାନଗର: ପରିବାର ପ୍ରତିପୋଷଣ ପାଇଁ ପୁଅ ବାହାରିଥିଲା ବାହାର ରାଜ୍ୟକୁ କାମ କରିବାକୁ। ନିଜ ମାଆ, ସ୍ତ୍ରୀ ଓ ୪ ବର୍ଷର ଝିଅକୁ ଛାଡ଼ି ଯାଉଥିଲେ କାମ କରି ପରିବାରରେ ହସ ଫୁଟାଇବାକୁ। ଦୁଇ ପଇସା ରୋଜଗାର କରି ନିଜର ଅଭାବକୁ ପୂରଣ କରିବାକୁ। କିନ୍ତୁ କିଏ ଜାଣିଥିଲା ବିଧିର ବିଧାନ କିଛି ଅଲଗା ଲେଖି ଦେଇଛି କପାଳରେ। ପରିବାର ଓ ଚାରି ବର୍ଷର ଝିଅ ଚାହିଁ ରହିଥିଲା ବାପାର ଫେରିବା ବାଟକୁ, ହେଲେ କିଏବା ଜାଣିଥିଲା ବାପା ଆଉ ଫେରିବେନି ବୋଲି। ଚଳନ୍ତା ଟ୍ରେନରୁ ପଡ଼ି ଚାଲିଗଲା ଓଡ଼ିଆ ଶ୍ରମିକଙ୍କ ଜୀବନ।
ସୂଚନା ଅନୁଯାୟୀ, ଏଭଳି ଏକ ଦୁଃଖଦ ଘଟଣା ଘଟିଛି ଢେ଼ଙ୍କାନାଳ ଜିଲା ପରଜଙ୍ଗ ଥାନା ଅନ୍ତର୍ଗତ କଳଦା ପଞ୍ଚାୟତ ଖୁଣ୍ଢେଇଖୋଲ ଗ୍ରାମରେ। ଗାଁର କୀର୍ତ୍ତନ ନାଏକଙ୍କ ପୁଅ ସୁଶାନ୍ତ ନାଏକ ଗତ ରବିବାର ଦିନ ସାଙ୍ଗମାନଙ୍କ ସହିତ ଭୁବନେଶ୍ୱରରୁ ଚେନ୍ନଇ ଟ୍ରେନରେ ଯାଉଥିବା ବେଳେ ନାଗପୁର ଅଞ୍ଚଳ ପାଖାପାଖି ଚଳନ୍ତା ଟ୍ରେନରୁ ଖସି ପଡ଼ି ତାଙ୍କର ମୃତ୍ୟୁ ଘଟିଥିଲା। ସୁଶାନ୍ତ ଚେନ୍ନଇର ଏକ କମ୍ପାନୀରେ ଶ୍ରମିକ ଭାବେ କାର୍ଯ୍ୟ କରିବାକୁ ଯାଉଥିଲେ। ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା। ମୃତଦେହ ନାଗପୁର କାମଠି ପୁଲିସ ଅଧୀନରେ ଥିବା ସୂଚନା ରହିଛି। ତେବେ ମୃତଦେହ ଘରକୁ ଆଣିବାକୁ ପାଖରେ ଅର୍ଥ ନାହିଁ ହେଲେ ପୁଅର ମୁହଁ ଶେଷଥର ପାଇଁ ଦେଖିବାକୁ ମାଆ, ସ୍ତ୍ରୀ ଓ ଝିଅ ଲୁହଭରା ଆଖିରେ ଚାହିଁ ରହିଛନ୍ତି ବାଟକୁ। ସୁଶାନ୍ତଙ୍କ ମୃତଦେହ ଘରକୁ ଫେରାଇ ଆଣିବାକୁ ରାଜ୍ୟ ଓ କେନ୍ଦ୍ର ସରକାରଙ୍କ ପାଖରେ ଆକୁଳ ନିବେଦନ କରିଛନ୍ତି ପରିବାର ଓ ସାହି ପଡ଼ିଶା।
