ଉପସ୍ୱାସ୍ଥ୍ୟ କେନ୍ଦ୍ର ନିମ୍ନମାନର ନିର୍ମାଣ ଅଭିଯୋଗ

ବାସୁଦେବପୁର: ଗ୍ରାମାଞ୍ଚଳରେ ସ୍ୱାସ୍ଥ୍ୟସେବାକୁ ଗୁରୁତ୍ୱ ଦେଇ ଲକ୍ଷ୍ମୀଦାସପୁର ଠାରେ ଉପସ୍ୱାସ୍ଥ୍ୟ କେନ୍ଦ୍ର ସ୍ଥାପନ କରାଯାଇଥିଲା। ସରକାରୀ ଭାବେ ଏହି ଉପସ୍ୱାସ୍ଥ୍ୟ କେନ୍ଦ୍ର ପାଇଁ ଠିକାଦାର ସୁକାନ୍ତ ଚରଣ ସେଠୀଙ୍କ ନାମରେ କାର୍ଯ୍ୟାଦେଶ ଦିଆଯାଇଥିଲା। ଦୁଇମହଲା ବିଶିଷ୍ଠ ଏହି ଉପସ୍ୱାସ୍ଥ୍ୟକେନ୍ଦ୍ର ନିର୍ମାଣ ପାଇଁ ୩୦ଲକ୍ଷ ୮୨ହଜାର ୭୮୪ଟଙ୍କା ବ୍ୟୟ ଅଟକଳ ଥିବା ବେଳେ ୨.୯୯ ପ୍ରତିଶତ କଟଣିରେ ଛଅମାସ ଅବଧି ସମୟ ମଧ୍ୟରେ ନିର୍ମାଣ କାର୍ଯ୍ୟ ସଂପୁର୍ଣ୍ଣ କରାଯିବ ବୋଲି ଉଲ୍ଲେଖ ରହିଛି। ଆଜକୁ ବର୍ଷେରୁ ଅଧିକ ସମୟ ବିତିଯାଇଥିଲେ ହେଁ ନିର୍ମାଣ କାର୍ଯ୍ୟ ସଂପୁର୍ଣ୍ଣ ହୋଇପାରୁନି। ତେଣେ ଠିକାଦାର ଜଣକ ମନୋମୁଖୀ ଭାବରେ ନିମ୍ନମାନର ନିର୍ମାଣ କାର୍ଯ୍ୟ ଚଳାଇ ଥିବାକୁ ନେଇ ସ୍ଥାନୀୟ ଗ୍ରାମବାସୀମାନେ ଅଭିଯୋଗ କରିଛନ୍ତି। ଏହାମଧ୍ୟରେ ଠିକାଦାର ଜଣକ ଏହି ପ୍ରକଳ୍ପ ବାବଦକୁ ୨୦୨୪ ମସିହା ମଇ ମାସ ୧୭ ତାରିଖରେ ୧୬ ଲକ୍ଷ ୭୮ହଜାର ୨୨୭ ଟଙ୍କା ଉଠାଇ ନେଇଥିବା ଜାଣିବାକୁ ମିଳିଛି। ଏନେଇ ସ୍ଥାନୀୟ ପଞ୍ଚାୟତର ପୁର୍ବତନ ସରପଞ୍ଚ ବୁଦ୍ଧିରାମ ସେଠୀ କୁହନ୍ତି, ନିର୍ମାଣ କାର୍ଯ୍ୟ ସମୟରେ କୈାଣସି ସରକାରୀ ଅଫିସର ଅଥବା କର୍ମଚାରୀ ଅନୁପସ୍ଥିତ ରହିବା କାରଣରୁ ପ୍ରକଳ୍ପ ନିର୍ମାଣ ନିମ୍ନମାନର ହେଉଛି। କଳଙ୍କି ଲାଗିଯାଇଥିବା ରଡ, କମ ପରିମାଣରେ ସିମେଣ୍ଟ ଦିଆଯିବା ସାଥିକୁ ପାଣି ସିଞ୍ଚନ କରାନଯିବା କାରଣରୁ ଏହି ପ୍ରକଳ୍ପର ସ୍ଥାୟିତ୍ୱ ନାହିଁ। ଏମିତି ବି ନିର୍ମାଣାଧିନ ପ୍ରକଳ୍ପର ସୂଚନାଫଳକ ବାବଦକୁ ୫ହଜାର ଟଙ୍କା ବ୍ୟୟ ବରାଦ ଥିବା ବେଳେ ଏଯାବତ ତାହା ନିର୍ମାଣ କରାଯାଇନାହିଁ। ଠିକାଦର ଜଣକ ପ୍ରଭାବଶାଳୀ ଲୋକ ହୋଇଥିବାରୁ ସରକାରଙ୍କ ତହବିଲରୁ ଜନସାଧାରଣଙ୍କ ସ୍ୱାର୍ଥ ଏବେ ଠିକାଦାରଙ୍କ ସ୍ୱାର୍ଥ ଭାବରେ ଉଭା ହୋଇଛି। ଦାୟିତ୍ୱରେ ଥିବା। କନିଷ୍ଠଯନ୍ତ୍ରୀ ତପନ ମହାପାତ୍ର କହିଛନ୍ତି, ନିମ୍ନମାନର ନିର୍ମାଣ ଅଭିଯୋଗକୁ ନେଇ ବିଡିଓଙ୍କୁ ଅବଗତ କରାଇସାରିଛି। ବିଡିଓ ସଞ୍ଜିବ କୁମାର ସାହୁ କହିଛନ୍ତି ଯେ ଏନେଇ ଅଭିଯୋଗ ଆସିବା ପରେ ତଦନ୍ତ ସହ କାର୍ଯ୍ୟାନୁଷ୍ଠାନ ନିଆଯିବ।