ମୁମ୍ବାଇ: ହିନ୍ଦୀ ସିନେମାର ପ୍ରସିଦ୍ଧ ନିର୍ଦେଶକ ନିତିନ ଚନ୍ଦ୍ରକାନ୍ତ ଦେଶାଇ(୫୮) ‘କରଜାତର ଏନଡି ଷ୍ଟୁଡିଓ’ରେ ଫାଶୀ ଲଗାଇ ଆତ୍ମହତ୍ୟା କରିଛନ୍ତି। ସୂଚନା ଅନୁସାରେ, ଏନଡି ଷ୍ଟୁଡିଓ କର୍ମଚାରୀମାନେ ତାଙ୍କୁ ଝୁଲନ୍ତା ଅବସ୍ଥାରେ ଦେଖି ତୁରନ୍ତ ପୁଲିସକୁ ଏ ବିଷୟରେ ଜଣାଇଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଅନେକ ହିନ୍ଦୀ ଚଳଚ୍ଚିତ୍ର ଏବଂ ଅନେକ ବଡ ଇଭେଣ୍ଟ ପାଇଁ ଗ୍ରାଣ୍ଡ୍ ସେଟ୍ ତିଆରି କରିବା ପାଇଁ ସେ ଜଣେ କଳା ନିର୍ଦେଶକ ଭାବରେ ସୁନାମ ଅର୍ଜନ କରିଥିଲେ। ୨୦୦୫ ମସିହାରେ ସେ ଏନ୍ଡ଼ି ଷ୍ଟୁଡ଼ିଓ ପ୍ରତିଷ୍ଠା କରିଥିଲେ। ୧୯୮୭ ମସିହାରୁ ସେ ଚଳଚ୍ଚିତ୍ରରେ କ୍ୟାରିୟର ଆରମ୍ଭ କରିଥିଲେ। ‘୧୯୪୨ ଏକ ଲଭ୍ ଷ୍ଟୋରୀ’ରେ ନିର୍ଦେଶନା ଦେଇଥିଲେ। ଏହା ପରେ ସେ ‘ହମ ଦିଲ ଦେ ଚୁକେ ସନମ’, ‘ଦେବଦାସ’, ‘ଲଗାନ’, ‘ଯୋଦ୍ଧା ଆକବର’, ‘ପ୍ରେମ ରତନ ଧନ ପାୟୋ’ ଭଳି ସିନେମାର କଳା ନିର୍ଦେଶନା କରିଥିଲେ। ମରାଠୀ ଫିଲ୍ମ ‘ହେଲୋ ଜୟ ହିନ୍ଦ’ରେ ବି ନିର୍ଦେଶନା ଦେଇଛନ୍ତି। ଆଶୁତୋଷ ଗୋୱାରିକର, ବିଦୁ ବିନୋଦ ଚୋପ୍ରା, ରାଜକୁମାର ହିରାନୀ ଏବଂ ସଞ୍ଜୟ ଲୀଲା ଭନସାଲୀଙ୍କ ଭଳି ନିର୍ଦେଶକଙ୍କ ସହ କାମ କରିଛନ୍ତି ନିତିନ୍। ଶ୍ରେଷ୍ଠ କଳା ନିର୍ଦେଶନା ପାଇଁ ଅନେକ ଜାତୀୟ ପୁରସ୍କାର ପାଇଛନ୍ତି।
Comments are closed.