ପୂର୍ବ ଶତ୍ରୁତାକୁ କେନ୍ଦ୍ର କରି ଟାଙ୍ଗିଆରେ ହାଣି ବୃଦ୍ଧଙ୍କୁ ହତ୍ୟା, ଅଭିଯୁକ୍ତକୁ ଧରି ପୁଲିସ ଜିମା ଦେଲେ ଗ୍ରାମବାସୀ

ବୌଦ୍ଧ : ବୌଦ୍ଧ ଜିଲା ଆମ୍ଭଝରୀ ପଞ୍ଚାତୟର ବଏଲବେଡା ଗ୍ରାମରେ ମଙ୍ଗଳବାର ଅପରାହ୍ନରେ ଏକ ଜଘଣ୍ୟ ହତ୍ୟାକାଣ୍ଡ ଘଟିଥିବା ଜଣାପଡିଛି। ମିଳିଥିବା ସୂଚନା ମୁତାବକ, ଗ୍ରାମର ବୀର ମନହୀରା(୭୦) ଓ ଗ୍ରାମର ପୂଜକ ଗୁଡୁ ଝାଙ୍କର(୬୫)ଙ୍କ ମଧ୍ୟରେ ଦୀର୍ଘଦିନ ହେବ ଶତ୍ରୁତା ଲାଗି ରହିଥିଲା। ମଙ୍ଗଳବାର ଦିନ ପୂଜକ ଗୁଡୁ ନିଜ ଜମିରେ ଏକ ବୋଦା ବଳୀ ଦେଇ ମାଟି ମାଆକୁ ପୂଜା କରି ସନ୍ଧ୍ୟା ପ୍ରାୟ ୫ ଘଣ୍ଟା ସମୟରେ ଘରକୁ ଫେରୁଥିଲେ। ଏହି ସମୟରେ ଗ୍ରାମର ବୀର ମନହୀରାଙ୍କ ନିଜ ଘର ବାରିପଟେ ବସିଥିଲେ। ପୂର୍ବ ଶ୍ରତୁତାକୁ କେନ୍ଦ୍ର କରି ଗୁଡୁ ଧରିଥିବା ଟାଙ୍ଗିରେ ବୀରକୁ ଗଳା ଓ ବିଭିନ୍ନ ସ୍ଥାନରେ ଆକ୍ରମଣ କରିଥିଲେ। ଘଟଣାସ୍ଥଳରେ ବୀରର ମୃତ୍ୟୁ ହୋଇଯିବାପରେ ଗୁଡୁ ଗ୍ରାମରୁ ଫେରାର ହେବାକୁ ଉଦ୍ୟମ କରୁଥିବାବେଳେ ଗ୍ରାମବାସୀମାନେ ତାଙ୍କୁ ଅଟକ ରଖିବା ସହିତ ପୋଲିସକୁ ସୂଚନା ଦେଇଥିଲେ।

ସୂଚନା ପାଇ ବୌଦ୍ଧଥାନା ଅଧିକାରୀ ତପସ୍ୱିନୀ କହଁର ଓ ବଘିଆପଡା ଫାଣ୍ଡି ଅଧିକାରୀ ତପନ କୁମାର ସ୍ୱାଇଁ ଘଟଣାସ୍ଥଳରେ ପହଞ୍ଚି ଶବକୁ ଜବତ କରିବା ସହିତ ଗ୍ରାମବାସୀଙ୍କ କବଳରୁ ଅଭିଯୁକ୍ତକୁ ଆଣିବା ସହ ହତ୍ୟାକାଣ୍ଡର କାରଣ ସଂପର୍କରେ ଅଧିକ ତଦନ୍ତ ଚଳାଇଥିବା ଜଣାପଡିଛି।