ମମତାଙ୍କୁ ରାମାୟଣ ପୁସ୍ତକ ପଠାଇଲେ ମଧ୍ୟପ୍ରଦେଶ ବାଚସ୍ପତି; କହିଲେ- ଶ୍ରୀରାମ ନାମ ଜପ କର

ଭୋପାଳ: ମଧ୍ୟପ୍ରଦେଶ ବିଧାନସଭାର କାମଚଳା ବାଚସ୍ପତି ତଥା ବିଧାୟକ ରାମେଶ୍ଵର ଶର୍ମା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ରାମାୟଣର ଏକ ପୁସ୍ତକ ପଠାଇଛନ୍ତି। ଏ ନେଇ ବାଚସ୍ପତି ଶର୍ମା ନିଜେ ଟ୍ବିଟ୍‌ କରି ସୂଚନା ଦେଇଛନ୍ତି। ଏହି ଅବସରରେ ସେ କହିଛନ୍ତି, ଅନେକ ବର୍ଷ ପରେ ଅଯୋଧ୍ୟାରେ ଭଗବାନ ଶ୍ରୀରାମଙ୍କ ମନ୍ଦିର ନିର୍ମାଣ ହେଉଛି। କିନ୍ତୁ ମମତା ଏହାକୁ ନେଇ ଅସନ୍ତୁଷ୍ଟ ଅଛନ୍ତି।

ଶର୍ମା କହିଛନ୍ତି, ରାମ ନାମ ଉଚ୍ଚାରଣକୁ ମମତା ଘୃଣା କରନ୍ତି। ମମତା ଦିଦି ମୁଁ ଆପଣଙ୍କୁ ପ୍ରାର୍ଥନା କରୁଛି ଯେ, ଆପଣ ‘ଜୟ ଶ୍ରୀରାମ’ କହିବା ଶିଖନ୍ତୁ। ଭଗବାନ ରାମଙ୍କୁ ବିରୋଧ କରିବା ବନ୍ଦ କରନ୍ତୁ। ପଶ୍ଚିମବଙ୍ଗରେ ଏକ କାର୍ଯ୍ୟକ୍ରମରେ ଆପଣ ଭଗବାନ ରାମଙ୍କୁ ଅପମାନିତ କରିଛନ୍ତି। ରାଜ୍ୟବାସୀ ବିଧାନସଭା ନିର୍ବାଚନରେ ଆପଣଙ୍କୁ ଉଚିତ ଶିକ୍ଷା ଦେବେ।

ଶର୍ମା ଆହୁରି କହିଥିଲେ, ମମତା ଦିଦି ଆପଣ ଭଗବାନ ରାମଙ୍କ ନାମ ଜପ କରନ୍ତୁ। ମୁଁ ଆପଣଙ୍କୁ ରାମାୟଣର ଏକ ପୁସ୍ତକ ପଠାଉଛି। ରାମାୟଣ ପଢ଼ନ୍ତୁ। ଆଶା କରୁଛି ଆପଣଙ୍କୁ ସଦ୍‌ବୁଦ୍ଧି ମିଳିବ। ସାରା ବିଶ୍ଵରେ ଯେପରି ପ୍ରଭୁ ଶ୍ରୀରାମଙ୍କ ଭକ୍ତ ଅଛନ୍ତି, ଆପଣ ମଧ୍ୟ ରାମାୟଣ ପଢ଼ି ତାଙ୍କ ଭକ୍ତ ହୋଇଯିବେ ଏବଂ ଜୟ ଶ୍ରୀରାମ ନାମ ଜପ କରିବେ। ତେବେ ଶର୍ମାଙ୍କ ଏହି ଟ୍ବିଟ୍‌କୁ ନେଇ ବେଶ୍‌ ଚର୍ଚ୍ଚା ହେଉଛି।

पश्चिम बंगाल की मुख्यमंत्री ममता दीदी को रामायण जी भेजी है उम्मीद है दीदी रामायण जी का पाठ करेंगी उनके चरित्र को समझेंगी और आगे से जय श्रीराम के नारों का विरोध नही करेंगी . @MamataOfficial @KailashOnline @ANI @blsanthosh @KapilMishra_IND @TajinderBagga pic.twitter.com/eTYMLITrqH

— Rameshwar Sharma (@rameshwar4111) January 24, 2021

ସୂଚନାଯୋଗ୍ୟ, ଗତ ଶନିବାର ନେତାଜୀ ଜୟନ୍ତୀ ଅବସରରେ କଲକାତାର ଭିକ୍ଟୋରିଆ ମେମୋରିଆଲରେ ଆୟୋଜିତ ପରାକ୍ରମ ଦିବସ ସମାରୋହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ସହିତ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଯୋଗଦେଇଥିଲେ। ଏହି ସମାରୋହରେ ଉପସ୍ଥିତ କିଛି ଲେକ ଜୟ ଶ୍ରୀରାମ ଏବଂ ଭାରତ ମାତା କୀ ଜୟ ନାରା ଦେବାରୁ ଦିଦି ରାଗିଯାଇ ଭାଷଣ ଦେବାକୁ ମନା କରିଦେଇଥିଲେ।