ଆରଡି: ମାସ୍କ ଚେକିଂ ଆଳରେ ଆରଡ଼ି ପୀଠକୁ ବାବା ଆଖଣ୍ଡଳମଣିଙ୍କ ଦର୍ଶନ ପାଇଁ ଆସିଥିବା ଯାଜପୁର ଜିଲା ମଙ୍ଗଳପୁର ଥାନା ଅରଦାଳୁଆ ଗାଁର ପ୍ରଦୀପ ମଇକାପଙ୍କ ୨ପୁଅ ଶୁଭରଞ୍ଜନ ଓ ସୌମ୍ୟରଞ୍ଜନଙ୍କୁ ପୁଲିସ ମାଡ଼ମାରିବା ସହ ମିଥ୍ୟା ମାମଲା ରୁଜୁ କରିବା ଆରଡ଼ି ଫାଣ୍ଡି ପୁଲିସକୁ ମହଙ୍ଗା ପଡ଼ିଲା। ମଙ୍ଗଳବାର ଭଦ୍ରକ ଏସପିଙ୍କ ନିର୍ଦେଶକ୍ରମେ ଫାଣ୍ଡି ଅଧିକାରୀ ପ୍ରଦୀପ ନାୟକ ଓ ହାବିଲଦାର ରମେଶ ମଲିକଙ୍କୁ ଜିଲା ହେଡକ୍ୱାର୍ଟରକୁ ବଦଳି କରାଯାଇଥିବା ଏଏସପି ପ୍ରକାଶ କରିଛନ୍ତି।
ସୂଚନା ଅନୁଯାୟୀ, ୨ଜଣ ଯୁବକ ଆରଡି ପୀଠକୁ ଆସୁଥିବା ବେଳେ ମାସ୍କ ନ ପିନ୍ଧିଥିବାରୁ ଆରଡି ଫାଣ୍ଡି ନିକଟରେ ପୁଲିସ ଅଟକାଇବା ସହ ଫାଇନ ଆଦାୟ କରୁଥିବା ସମୟରେ ଯୁବକ ଓ ପୁଲିସଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଯୁବକଜଣକ ମୋବାଇଲ ଯୋଗେ ଭିଡିଓ ଉତ୍ତୋଳନ କରିବାରୁ ଫାଣ୍ଡି ଅଧିକାରୀଙ୍କ ସହ ଅନ୍ୟ ୩/୪ଜଣ ପୁଲିସ ତଳେ ପକାଇ ମାଡ ମାରିଥିଲେ। ଏହାର ଭିଡଓ ସୋସିଆଲ ମିଡିଆରେ ଭାଇରାଲ ହେବା ପରେ ସୋମବାର ଧାମନଗର ଏସଡିପିଓ ଅଶୋକ ଦାସ ଘଟଣାର ତଦନ୍ତ କରି ଏସପିଙ୍କୁ ରିପୋର୍ଟ ଦେଇଥିଲେ। ମଙ୍ଗଳବାର ଏସପିଙ୍କ ନିର୍ଦେଶ ଅନୁଯାୟୀ ୨ଜଣ ଅଧିକାରୀଙ୍କୁ ଜିଲା ହେଡକ୍ୱାର୍ଟରକୁ ବଦଳି କରାଯାଇଛି।
