ମାଲକାନଗିରି: ମାଲକାନଗିରି ଜିଲାପାଳ ଓ ଆରକ୍ଷୀ ଅଧିକ୍ଷକ ଆଜି ଜିଲାର ଚିତ୍ରକୋଣ୍ଡା ବ୍ଲକ ଅନ୍ତର୍ଗତ ସ୍ୱାଭିମାନ ଅଂଚଳର ୪ ଟି ପଞ୍ଚାୟତ ଗସ୍ତ କରି ଲୋକଙ୍କ ସମସ୍ୟା ବୁଝିଛନ୍ତି । ଜିଲ୍ଲାପାଳ ଵିଶାଲ ସିଂହ ଓ ଆରକ୍ଷୀ ଅଧିକ୍ଷକ ପ୍ରହଲ୍ଲାଦ ସହାଇ ମିନା ଆଜି ସ୍ୱାଭିମାନ ଅଞ୍ଚଳର ୪ ଟି ପଞ୍ଚାୟତ ଗସ୍ତ କରି ଜନସାଧରଣଙ୍କ ସହ ସେମାନଙ୍କ ସମସ୍ୟା ନେଇ ସିଧାସଳଖ ଆଲୋଚନା କରିଛନ୍ତି । ସ୍ୱାଭିମାନ ଅଞ୍ଚଳର ଯୋଡାମ୍ବ, ପଣସପୁଟ, ଗାଜଲମାମୁଡ଼ି ଓ ପାପରମେଟଲା ପଞ୍ଚାୟତରେ ପହଞ୍ଚି ଲୋକଙ୍କ ସୁବିଧା ଅସୁବିଧା ସମ୍ପର୍କରେ ପଚାରି ବୁଝିଥିଲେ।
ଆଲୋଚନା ବେଳେ ଲୋକେ ସମ୍ପୃକ୍ତ ଅଞ୍ଚଳରେ ମୋବାଇଲ ଟାୱାର ପ୍ରତିଷ୍ଠା, ପାନୀୟଜଳର ସୁବିଧା ପାଇଁ ସୋଲାର ଜଳ ଯୋଗାଣ ପ୍ରକଳ୍ପ, କ୍ଷୁଦ୍ର ଜଳସେଚନ ପ୍ରକଳ୍ପ ନିର୍ମାଣ ଓ ବେକାରୀ ଯୁବକଙ୍କୁ ତାଲିମ ଦେଇ ବିଦ୍ୟୁତ ବିଭାଗରେ ନିଯୁକ୍ତି ଦେଲେ ବିଦ୍ୟୁତ ସମସ୍ୟା ଶୀଘ୍ର ଦୂର ହୋଇ ପାରିବ ବୋଲି ପ୍ରସ୍ତାବ ଦେଇଥିଲେ। ଜିଲାପାଳ ଶ୍ରୀ ସିଂହ ଏହି ସମସ୍ତ ସମସ୍ୟାର ସମାଧାନ ପାଇଁ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେବା ସହ କିଛି ସମସ୍ୟା ଥିଲେ ସିଧାସଳଖ ଯୋଗାଯୋଗ କରିବାକୁ କହିଥିଲେ। ଏ ଅବସରରେ ଆରକ୍ଷୀ ଅଧିକ୍ଷକ ଶ୍ରୀ ମିନା ଜନସାଧାରଣଙ୍କ ସୁରକ୍ଷା ପାଇଁ ପୋଲିସ ସର୍ବଦା ରହିଛି ଓ ମାଓ ସମସ୍ୟା ଦୁର ପାଇଁ ତଲାସୀ ଅଭିଯାନ ଜାରୀ ରହିଛି ବୋଲି କହିଥିଲେ । ଏହି ଗସ୍ତ ବେଳେ ଜିଲ୍ଲା ପ୍ରଶାସନର ଅନ୍ୟ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ ।
