ପାଟଣା : କେନ୍ଦୁଝର ଜିଲ୍ଲା ଘଟଗାଁ ଥାନା ଢେଙ୍କିକୋଟ ପୁଲିସ ବିଟ ହାଉସ ଅନ୍ତର୍ଗତ ବଡ଼ମସିଣାବିଲା ଗ୍ରାମପଞ୍ଚାୟତ ପାଣପଶି ଗ୍ରାମରେ ଗତ ୧୩ ତାରିଖ ରାତିରେ ପରକୀୟାପ୍ରୀତିରୁ ଗ୍ରାମର ସୁବ୍ରତ କୁମାର ମହାକୁଡ଼ (୨୬)କୁ ଗ୍ରାମର ପ୍ରଶାନ୍ତ ନାଏକ ଏବଂ ତାର ସାନ ଭାଇ ଅଜୟ ନାଏକ ହତ୍ୟା କରିଥିବା ଅଭିଯୋଗ ହୋଇଥିଲା । ପୁଲିସ ଘଟଣାର ତଦନ୍ତ କରି ଉଭୟଙ୍କୁ ଗିରଫ କରିଛି । ଘଟଣାରୁ ଜଣା ପଡିଛି ଯେ ସୁବ୍ରତ କୁମାର ମହାକୁଡ଼ର ପ୍ରଶାନ୍ତ ନାଏକଙ୍କ ପତ୍ନୀ ସହିତ ପ୍ରେମ ସମ୍ପର୍କ ଗଢି ଉଠିଥିଲା। ଏ ସମ୍ପର୍କରେ ପ୍ରଶାନ୍ତ ଜାଣିବା ପରେ ସେ ସୁବ୍ରତକୁ ଡାକି ବାରଣ କରିଥିଲା। ଏପରିକି ବାରମ୍ବାର ବାରଣ କରିବା ସତ୍ତ୍ବେ ଉଭୟଙ୍କ ପ୍ରେମ ସମ୍ପର୍କ ବଢି ବଢି ଚାଲିଥିଲା। ସୁବ୍ରତ ସହିତ ପ୍ରଶାନ୍ତର ଝଗଡା ମଧ୍ୟ ବହୁବାର ହୋଇଥିଲା। ସୁବ୍ରତ ନ ମାନିବାରୁ ପ୍ରଶାନ୍ତ ସୁବ୍ରତକୁ ସବୁ ଦିନ ପାଇଁ ରାସ୍ତାରୁ ହଟାଇବା ପାଇଁ ଯୋଜନା କରିଥିଲା ଏବଂ ଗତ ୧୩ ତାରିଖ ରାତିରେ ସୁବ୍ରତ ଶୋଇଥିବାବେଳେ ତାକୁ ଫୋନ କରି ଝଗଡା କରି ଉତ୍ୟକ୍ତ କରିଥିଲା ଏଠାକୁ ଆସ କିପରି ହାଣିବୁ କହି ଡାକିଥିଲା। ସୁବ୍ରତ ରାଗ ଜରଜର ହୋଇ ପ୍ରଶାନ୍ତ ଘର ନିକଟକୁ ଯାଇଥିବାବେଳେ ଯୋଜନା ବଦ୍ଧ ଭାବେ ପ୍ରଶାନ୍ତ ଓ ତାର ସାନ ଭାଇ ଅଜୟ ଟାଙ୍ଗିଆ ଏବଂ ଲୁହା ପାଇପ ଧରି ସୁବ୍ରତକୁ ଜୀବନରୁ ମାରି ଦେବା ପାଇଁ ପ୍ରସ୍ତୁତ ହୋଇଥିଲେ। ସୁବ୍ରତ ପହଞ୍ଚିବାକ୍ଷଣି ତା ସହିତ ପାଟି ତୁଣ୍ଡ କରିବା ସହିତ ଅନ୍ଧାରର ସୁଯୋଗରେ ତାର ମୁଣ୍ଡ ବେକକୁ ବାରମ୍ବାର ଚୋଟ ପରେ ଚୋଟ ହାଣି ତଳେ ପକାଇ ଦେଇଥିଲେ। ଏବଂ ଲୁହା ପାଇପରେ ମୁଣ୍ଡକୁ ମାରି ଫଟାଇ ଦେଇଥିଲେ । ପରେ ରାସ୍ତା କଡ଼ରେ ଫିଙ୍ଗି ଦେଇଥିଲେ। ଘଟଗାଁ ଥାନା ଆଇ.ଆଇ.ସି ଶୁଭ୍ରାନ୍ତ କୁମାର ଜେନା ଘଟଣାର ତଦନ୍ତ କରି ଥାନା କେସ ନମ୍ୱର ୨୫/୨୦୨୫ ରେ ନରହତ୍ୟା ମାମଲା କରି ଗତ ୧୪ ତାରିଖ ଦୁଇ ଭାଇଙ୍କୁ ଗିରଫ କରି କୋର୍ଟ ଚାଲାଣ କରିଛି। ତାଙ୍କଠାରୁ ହତ୍ୟାରେ ବ୍ୟବହୃତ ଟାଙ୍ଗିଆ ଏବଂ ଲୁହା ପାଇପ ଜବତ କରାଯାଇଛି।
Comments are closed.