ମୁମ୍ବଇ : ମହାରାଷ୍ଟ୍ର କୃଷିମନ୍ତ୍ରୀ ପନ୍ଦୁରଙ୍ଗ ଫୁନ୍ଦକରଙ୍କର ଗୁରୁବାର ମୁମ୍ବଇସ୍ଥିତ ସୋମୈୟା ଡାକ୍ତରଖାନାରେ ପରଲୋକ ଘଟିଛି। ଅସୁସ୍ଥତା କାରଣରୁ ୬୭ ବର୍ଷ ବୟସ୍କ ଫୁନ୍ଦକରଙ୍କୁ ଗତ ସପ୍ତାହରେ ଯଶଲୋକ ହସ୍ପିଟାଲରେ ଭର୍ତ୍ତି କରାଯାଇଥିଲା। ଆରୋଗ୍ୟ ହେବା ପରେ ସେ ଘରକୁ ଫେରିଯାଇଥିଲେ। ମାତ୍ର ବୁଧବାର ସକାଳେ ପୁନଃ ଅସୁସ୍ଥ ହୋଇପଡିବାରୁ ତାଙ୍କୁ ସୋମୈୟା ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ୨୦୧୬ ଜୁଲାଇରେ ଫଡନାବିସ୍ଙ୍କ ମନ୍ତ୍ରିମଣ୍ଡଳରେ ଫୁନ୍ଦକରଙ୍କୁ ସାମିଲ କରାଯାଇଥିଲା। ତାଙ୍କ ପୁତ୍ର ଆକାଶ ପନ୍ଦୁରଙ୍ଗ ଖମଗାଓଁର ବିଧାୟକ ଅଛନ୍ତି। ଫୁନ୍ଦକରଙ୍କ ବିୟୋଗରେ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାବିସ୍ଙ୍କ ସମେତ ବହୁ ମନ୍ତ୍ରୀ ଏବଂ ବିଶିଷ୍ଟ ନେତା ଗଭୀର ଦୁଃଖ ପ୍ରକାଶ କରିବା ସହିତ ତାଙ୍କ ପରିବାରବର୍ଗକୁ ସମବେଦନା ଜଣାଇଛନ୍ତି।
