ଚେନ୍ନଇ: ମଦୁରାଇ ଯାଉଥିବା ଏକ ଘରୋଇ ବିମାନ କମ୍ପାନୀର ବିମାନରେ ଶୁକ୍ରବାର ମଝି ଆକାଶରେ ଯାନ୍ତ୍ରିକ ତ୍ରୁଟି ଦେଖାଦେଇଛି। ଏହି କାରଣରୁ ଏହାକୁ ଚେନ୍ନଇ ଫେରିବାକୁ ପଡ଼ିଥିଲା। ବିମାନବନ୍ଦର ଅଧିକାରୀମାନେ କହିଛନ୍ତି ଯେ, ପ୍ରାୟ ଅଧ ଘଣ୍ଟା ଉଡ଼ାଣ ପରେ ଇଣ୍ଡିଗୋ ଏୟାରଲାଇନ୍ସର ପାଇଲଟ୍ ବିମାନଟି ତ୍ରୁଟି ଜାଣିପାରିଥିଲେ ଏବଂ ଚେନ୍ନଇ ଫେରିବା ଓ ଅବତରଣ ପାଇଁ ଅନୁମତି ମାଗିଥିଲେ। ଏହାପରେ ପ୍ରାୟ ୬୮ ଯାତ୍ରୀଙ୍କୁ ନେଇ ଯାଉଥିବା ବିମାନଟି ପରେ ଏଠାରେ ସୁରକ୍ଷିତ ଭାବରେ ଅବତରଣ କରିଥିଲା। ସମସ୍ତ ଯାତ୍ରୀଙ୍କୁ ବିମାନରୁ ଓହ୍ଲାଇ ଦିଆଯାଇଥିଲା। ଏ ବିଷୟରେ ଇଣ୍ଡିଗୋ ପକ୍ଷରୁ ତୁରନ୍ତ କୌଣସି ପ୍ରତିକ୍ରିୟା ମିଳିନାହିଁ।
ଏହା ପୂର୍ବରୁ ଜୁନ୍ ୧୭ ତାରିଖରେ କେରଳର କୋଚିରୁ ଦିଲ୍ଲୀ ଆସୁଥିବା ଇଣ୍ଡିଗୋ ବିମାନ ୬ଇ-୨୭୦୬କୁ ନାଗପୁରରେ ଜରୁରୀକାଳୀନ ଅବତରଣ କରିବାକୁ ପଡ଼ିଥିଲା। ବିମାନକୁ ବୋମା ଧମକ ମିଳିବା ପରେ ସତର୍କତାମୂଳକ ପଦକ୍ଷେପସ୍ଵରୂପ ଏଭଳି ନିଷ୍ପତ୍ତି ନିଆଯାଇଥିଲା।
ସୂଚନାଯୋଗ୍ୟ, ଅହମ୍ମଦାବାଦ ଏୟାର ଇଣ୍ଡିଆ ବିମାନ ଦୁର୍ଘଟଣା ପରଠାରୁ ଲଗାତର ଭାବେ ଏୟାର ଇଣ୍ଡିଆ ସମେତ ଅନ୍ୟ ଏୟାରଲାଇନ୍ସର ଏକାଧିକ ବିମାନରେ ଯାନ୍ତ୍ରିତ ତ୍ରୁଟି ଖବର ସାମ୍ନାକୁ ଆସୁଛି, ଯାହାକୁ ନେଇ ଲୋକେ ବିମାନ ଯାତ୍ରାକୁ ଅସୁରକ୍ଷିତ ମଣିବାସହ ଯାତ୍ରା କରିବାକୁ ଭୟ କରୁଛନ୍ତି।
