ମୁମ୍ବଇ: ନିଜ ଅଭିନୟ ଓ ନୃତ୍ୟ ବଳରେ ଲୋକଙ୍କ ହୃଦୟରେ ଏକ ସ୍ଵତନ୍ତ୍ର ସ୍ଥାନ ଅଧିକାର କରିଥିବା ବଲିଉଡ଼ର ଧକ୍ଧକ୍ ଗାର୍ଲ ମାଧୁରୀ ଦୀକ୍ଷିତ୍ ଏବେ ସମାଲୋଚନା ଓ ଘୃଣାର ପାତ୍ର ହୋଇଛନ୍ତି। ଏହାର କାରଣ ପାକିସ୍ତାନୀ ପ୍ରମୋଟରଙ୍କ ସହ ମିଶି କାମ କରିବା, ଯାହାଙ୍କୁ କି ଭାରତ ସରକାର କଳା ତାଲିକାଭୁକ୍ତ କରିଛନ୍ତି। ହ୍ୟୁଷ୍ଟନସ୍ଥିତ ପାକିସ୍ତାନୀ ପ୍ରମୋଟର ରେହାନ ସିଦ୍ଦିକିଙ୍କ ମିଳିତ ସହଯୋଗରେ କାମ କରିବା ଯୋଗୁ ମାଧୁରୀଙ୍କୁ ତୀବ୍ର ସମାଲୋଚନାର ଶିକାର ହେବାକୁ ପଡ଼ିଛି। ରେହାନ ସିଦ୍ଦିକି ଆଇଏସଆଇ ସହ ଜଡ଼ିତ ଥିବା ଅଭିଯୋଗରେ ଭାରତ ସରକାର ତାଙ୍କୁ କଳା ତାଲିକାଭୁକ୍ତ କରିଛନ୍ତି। ଶୁକ୍ରବାର ସୁନନ୍ଦା ବଶିଷ୍ଠ ମାଧୁରୀ ଓ ରେହାନଙ୍କ ଇଭେଣ୍ଟର ପୋଷ୍ଟରର ଏକ ଫଟୋ ଶେୟାର କରିଛନ୍ତି, ଯାହା ଟେକ୍ସାସର ହ୍ୟୁଷ୍ଟନରେ ସ୍ୱାଧୀନତା ଦିବସର ଗୋଟିଏ ଦିନ ପରେ ଅଗଷ୍ଟ ୨୦୨୪ରେ ଆୟୋଜିତ ହେବ। ଏକ୍ସରେ ସେ ରେହାନଙ୍କ ସହ କାମ କରିବାକୁ ନେଇ ମାଧୁରୀ ଦୀକ୍ଷିତଙ୍କୁ ସମାଲୋଚନା କରିଛନ୍ତି ଏବଂ ଅଭିନେତ୍ରୀଙ୍କୁ ଏହା ନକରିବାକୁ ଅନୁରୋଧ କରିଛନ୍ତି। ସେ ବିଜେପି ମନ୍ତ୍ରୀ କିଶନ ରେଡ୍ଡୀଙ୍କ ଏକ ଚାରି ବର୍ଷ ପୁରୁଣା ପତ୍ରକୁ ମଧ୍ୟ ଶେୟାର କରିଛନ୍ତି। ଏଥିରେ ଲେଖାଯାଇଛି ଯେ, ରେହାନଙ୍କୁ ଭାରତ ସରକାର କଳା ତାଲିକାଭୁକ୍ତ କରିଛନ୍ତି।
Shocked to see @MadhuriDixit collaborate with Pakistani origin promoter who has been on the radar of Indian agencies and has been blacklisted by Govt of India. Minister @kishanreddybjp as MoS Home had publicly announced that Houston based Pakistani origin promoter, Rehan Siddiqi… pic.twitter.com/Kqu7lttt3k
— Sunanda Vashisht (@sunandavashisht) June 28, 2024
ସୁନନ୍ଦା ଲେଖିଛନ୍ତି, ‘‘ଦେଖି ଆଶ୍ଚର୍ଯ୍ୟ ଲାଗିଲା ଯେ, ମାଧୁରୀ ଦୀକ୍ଷିତ ପାକିସ୍ତାନୀ ପ୍ରମୋଟରଙ୍କ ସହ ସହଯୋଗ କରିଛନ୍ତି, ଯିଏ କି ଭାରତୀୟ ଏଜେନ୍ସିମାନଙ୍କ ସ୍କାନରରେ ଅଛନ୍ତି ଏବଂ ଭାରତ ସରକାର ତାଙ୍କୁ କଳା ତାଲିକାଭୁକ୍ତ କରିଛନ୍ତି। ଗୃହ ରାଷ୍ଟ୍ରମନ୍ତ୍ରୀ ଭାବେ ବିଜେପିର କିଶନ ରେଡ୍ଡୀ ଘୋଷଣା କରିଥିଲେ ଯେ, ହ୍ୟୁଷ୍ଟନସ୍ଥିତ ପାକିସ୍ତାନୀ ପ୍ରମୋଟର ରେହାନ୍ ସିଦ୍ଦିକିଙ୍କୁ କଳା ତାଲିକାଭୁକ୍ତ କରାଯାଇଛି ଏବଂ ତାଙ୍କ ସହ କାମ ନ କରିବାକୁ ବଲିଉଡ ସେଲିବ୍ରିଟିମାନଙ୍କୁ ଅନୁରୋଧ କରିଥିଲେ।’’ ଏହି ପୋଷ୍ଟ ଦେଖି ଅନେକ ଲୋକ ମାଧୁରୀଙ୍କୁ ସମାଲୋଚନା କରିବା ସହ କ୍ରୋଧିକ ହୋଇ ଘୃଣା ପୂର୍ବକ ପ୍ରତିକ୍ରିୟା ଦେଇଛନ୍ତି।
