ରାସ୍ତା ନାହିଁ ତ ଭୋଟ ନାହିଁ : ୭ଟି ଗ୍ରାମବାସୀଙ୍କ ଚେତାବନୀ

ଲାଞ୍ଜିଗଡ଼: ସ୍ୱାଧୀନତାର ୭୭ବର୍ଷ ପରେ ମଧ୍ୟ ଆଜି ବି ଗାଁକୁ ନାହିଁ ଭଲ ରାସ୍ତା। ରାସ୍ତା ନାହିଁ ତ ଭୋଟ ନାହିଁ। ଏଭଳି ଚେତାବନୀ ଦେଇଛନ୍ତି କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ଲାଖବାହଲି ପଞ୍ଚାୟତର ବାରଗୁଡା ସମେତ ସାତଗୋଟି ଗ୍ରାମର ଗ୍ରାମବାସୀ । ସୋମବାର ବାରଗୁଡା ଆମ୍ବତୋଟା ଠାରେ ରାସ୍ତା ପାଇଁ ଏକ ବୈଠକ କରି ଯଥାଶୀଘ୍ର ରାସ୍ତା ନିର୍ମାଣ ନହେଲେ ୨୦୨୪ ସାଧାରଣ ନିର୍ବାଚନରେ ଭୋଟ ବର୍ଜନର ଚେତାବନୀ ଦେଇଛନ୍ତି ଗ୍ରାମବାସୀ। ସୂଚନା ଅନୁସାରେ ବାରଗୁଡା ଗାଁ ପଞ୍ଚାୟତ ମୁଖ୍ୟାଳୟ ଠାରୁ ୨ କିମି ଦୂରରେ। ଏହି ଗାଁକୁ ଆଜି ପର୍ୟ୍ୟନ୍ତ ଭଲ ରାସ୍ତା ଖଣ୍ଡିଏ ତିଆରି ହୋଇନାହିଁ । ଗାଁଠୁ ଥୁଆନାଲ ୨ କି.ମି, ପଣଷଗୁଡ଼ା ଦେଢ଼ କି.ମି , ଶୋରଗୁଡ଼ା ଅଢେଇ କି.ମି, ପଟାଙ୍ଗ ପଦର ୨ କି.ମି, ସାନ ଖାଲଗୁଡ଼ା ୩ କି.ମି ଏବଂ ସିର୍କୀଝୁଲକୁ ୨ କି.ମି ଥିବାବେଳେ ଗ୍ରାମବାସୀମାନେ ଚାଲିଚାଲି ଯାତାୟତ କରିଥାନ୍ତି।

ବାରଗୁଡ଼ାରେ ୯୫ ପରିବାର, ପଣଷଗୁଡ଼ାରେ ୨୦ ପରିବାର, ପଟାଙ୍ଗପଦରରେ ୫୦ ପରିବାର, ଶୋରଗୁଡ଼ାରେ ୨୫ ପରିବାର, ସାନ ଖାଲଗୁଡ଼ାରେ ୨୦ ପରିବାର ସମେତ ୨ ଶହରୁ ଉର୍ଦ୍ଧ୍ବ ପରିବାର ଥିବାବେଳେ ୧ ହଜାରରୁ ଉର୍ଦ୍ଧ୍ବ ଭୋଟର ଅଛନ୍ତି। ହେଲେ କେନ୍ଦ୍ର ଓ ରାଜ୍ୟ ସରକାରଙ୍କ ମାଳମାଳ ଯୋଜନା ସ୍ୱତ୍ୱେ ଏବେବି ଆଦିବାସୀ ଅଧ୍ୟୁଷିତ ଉପାନ୍ତ ଅଞ୍ଚଳର ଅନେକ ଗାଁ ଅପହଞ୍ଚ ହୋଇରହିଛି । ରାସ୍ତା ପାଇଁ ପଞ୍ଚାୟତ, ବ୍ଲକ ଓ ଜିଲ୍ଲାପାଳଙ୍କ ଅଭିଯୋଗ ଶୁଣାଣିରେ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳିନଥିବାରୁ ଭୋଟ ବର୍ଜନ କରିବାକୁ ଚେତାବନୀ ଦେଇଛନ୍ତି। ସୋମବାର ବାରଗୁଡା ଆମ୍ବତୋଟା ଠାରେ ୭ଟି ଗାଁର ଶତାଧିକ ମହିଳା ଓ ପୁରୁଷ ଭୋଟର ଏକତ୍ରିତ ହୋଇ ଭୋଟ ବର୍ଜନ ପାଇଁ ନିଷ୍ପତି ନେଇଛନ୍ତି । ରାସ୍ତା ନାହିଁ ତ ଭୋଟ ନାହିଁ ବୋଲି ନାରା ଦେଇଛନ୍ତି। ଯଥାଶୀଘ୍ର ଦାବି ପୂରଣ ନହେଲେ ରାସ୍ତା ଅବରୋଧ କରିବାକୁ ଚେତାବନୀ ଦେଇଛନ୍ତି ଗ୍ରାମବାସୀ।