ପିପିଲି: ପିପିଲି ଥାନା ଅନ୍ତର୍ଗତ ସିଂହାରପୁର ନିକଟରେ ରହୁଥିବା ପୋଷଲ ମାଇନର କେନାଲ କାର୍ଯ୍ୟରେ ନିୟୋଜିତ ଶ୍ରମିକ କ୍ୟାମ୍ପ ଉପରକୁ ଦାଦାବଟି ପାଇଁ ବୋମାମାଡ କରାଯିବା ସହ କାର୍ଯ୍ୟରେ ନିୟୋଜିତ ଏକ ଜେସିବି ଓ ହିଟାଚି ମେସିନକୁ ଶନିବାର ରାତିରେ ଭଙ୍ଗାରୁଜା କରାଯାଇଥିବା ଅଭିଯୋଗ ହୋଇଛି। ରିପୋର୍ଟ ଲେଖାଯିବା ପର୍ଯ୍ୟନ୍ତ ଅର୍ଥାତ ରବିବାର ସଂନ୍ଧ୍ୟା ସୁଦ୍ଧା ଏସଂପର୍କରେ ପିପିଲି ପୁଲିସରେ କୌଣସି ଲିଖିତ ଅଭିଯୋଗ ହୋଇନଥିବା ବେଳେ ପୁଲିସ ଘଟଣାର ଅନୁସନ୍ଧାନ ଚଳାଇଛି।
ମିଳିଥିବା ସୂଚନା ଅନୁଯାୟୀ, ପୋଷଲ ମାଇନର କାର୍ଯ୍ୟ ଚାଲିଥିବା ବେଳେ ଉକ୍ତ କାର୍ଯ୍ୟରେ ନିୟୋଜିତ ଶ୍ରମିକମାନେ ସିଂହାରପୁର ନିକଟରେ କ୍ୟାମ୍ପ କରି ରହୁଥିଲେ। ଉକ୍ତ କାର୍ଯ୍ୟରେ ନିୟୋଜିତ ଠିକା ସଂସ୍ଥାର ଜନୈକ କର୍ମଚାରୀ ମଙ୍ଗୁଳି ଜେନାଙ୍କ କହିବା ଅନୁଯାୟୀ, ଗତ ୨ଦିନ ତଳେ ୨ଜଣ ଯୁବକ ଆସି ସେମାନଙ୍କୁ ଦାଦାବଟି ମାଗିବା ସହ ଧମକଚମକ ଦେଇଥିଲେ। ଶନିବାର ରାତିରେ ଏକାଧିକ ଯୁବକ ଆସି ଉକ୍ତ ଶ୍ରମିକ କ୍ୟାମ୍ପ ନିକଟରେ ୫ରୁ ଊର୍ଦ୍ଧ୍ବ ବୋତଲବୋମା ମାଡ କରିବା ସହ ସେଠାରେ ଥିବା ଏକ ଜେସିବି ଓ ହିଟାଚି ମେସିନକୁ ବାଡେଇ ଭଙ୍ଗାରୁଜା କରିଥିଲେ।
ବୋମାମାଡରେ କୌଣସି ଶ୍ରମିକଙ୍କର କୌଣସି କ୍ଷୟକ୍ଷତି ଘଟିନଥିବା ସୂଚନା ମିଳିଛି। କ୍ୟାମ୍ପରେ ଥିବା ୫୦ରୁ ଊର୍ଦ୍ଧ୍ବ ଶ୍ରମିକ ଏହାକୁ ନେଇ ଭୟଭିତ ହୋଇପଡ଼ିଛନ୍ତି। ଖବର ପାଇ ରବିବାର ପୂର୍ବାହ୍ନରେ ପିପିଲି ଆଇଆଇସି ସୌମେନ୍ଦୁ ଶେଖର ତ୍ରିପାଠୀ, ସାତଶଙ୍ଖ ଫାଣ୍ଡି ଅଧିକାରୀ ପ୍ରକାଶ ମଲ୍ଲିକ ପ୍ରମୁଖ ଘଟଣାସ୍ଥଳରେ ପହଞ୍ଚି ଅନୁସନ୍ଧାନ ଚଳାଇଥିଲେ। ତେବେ ଘଟଣା ସଂପର୍କରେ ରବିବାର ସଂନ୍ଧ୍ୟା ସୁଦ୍ଧା ପୁଲିସ ନିକଟରେ କୌଣସି ଲିଖିତ ଅଭିଯୋଗ ପହଞ୍ଚି ନଥିବା ସଂପର୍କରେ ଆଇଆଇସି ଶ୍ରୀ ତ୍ରିପାଠୀ ସୂଚନା ଦେଇଛନ୍ତି। ଅଭିଯୋଗ ହେବା ପରେ ଘଟଣାର ତଦନ୍ତ କରାଯାଇ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇଆଇସି କହିଛନ୍ତି।
Comments are closed.