ଅହମ୍ମଦାବାଦ, : ବୁଧବାର ୱେଷ୍ଟଇଣ୍ଡିଜ୍ ବିପକ୍ଷରେ ୨ୟ ଦିନିକିଆ ମ୍ୟାଚ୍ ଖେଳିବା ସହ ପୂର୍ବତନ ଭାରତୀୟ ଅଧିନାୟକ ବିରାଟ କୋହଲି ଆଉ ଏକ କୀର୍ତ୍ତିମାନ ସ୍ଥାପନ କରିବେ। ୫ମ ଭାରତୀୟ କ୍ରିକେଟର ଭାବେ ଘରୋଇମାଟିରେ ୧୦୦ ଦିନିକିଆ ମ୍ୟାଚ୍ ଖେଳିବେ। ପୂର୍ବରୁ ସଚିନ ଭାରତମାଟିରେ ୧୬୪ଟି, ମହେନ୍ଦ୍ର ସିଂହ ଧୋନି ୧୨୭ଟି, ମହମ୍ମଦ ଆଝାରୁଦ୍ଦିନ ୧୧୩ଟି ଓ ଯୁବରାଜ ସିଂହ ୧୦୮ଟି ଦିନିକିଆ ମ୍ୟାଚ୍ ଖେଳିଛନ୍ତି। ଅଦ୍ୟାବଧି ଭାରତମାଟିରେ ୯୯ଟି ଦିନିକିଆ ମ୍ୟାଚ୍ ଖେଳିଥିବା ବିରାଟ କୋହଲି ରବିବାର ପ୍ରଥମ ଦିନିକିଆରେ ମଧ୍ୟ ଏକ କୀର୍ତ୍ତିମାନ ହାସଲ କରିଥିଲେ। ଘରୋଇମାଟିରେ ୫୦୦୦ ଦିନିକିଆ ରନ୍ ସ୍କୋର୍ କରିବାରେ କୋହଲି ଦ୍ରୁତତମ ଭାରତୀୟ ବ୍ୟାଟ୍ସମ୍ୟାନ୍ ହୋଇଥିଲେ। ଏହି କ୍ରମରେ ସେ ବ୍ୟାଟିଂ କିମ୍ବଦନ୍ତୀ ସଚିନ ତେନ୍ଦୁଲକରଙ୍କୁ ଅତିକ୍ରମ କରିଥିଲେ। କୋହଲି ରବିବାର ତାଙ୍କର ୯୬ତମ ଦିନିକିଆ ଇନିଂସରେ ଖେଳି ୫୦୦୦ ରନ୍ ପୂରଣ କରିଥିଲେ। କୋହଲି ଅଦ୍ୟାବଧି ମୋଟ ୨୫୮ଟି ଦିନିକିଆ ମ୍ୟାଚ୍ ଖେଳିଥିବା ବେଳେ ବିଦେଶରେ ୧୫୯ଟି ଦିନିକିଆ ମ୍ୟାଚ୍ ଖେଳିଛନ୍ତି।
Comments are closed.