କେଶଦୁରାପାଳ: ଆନନ୍ଦପୁର ପୌରପରିଷଦର ଅଧ୍ୟକ୍ଷା ରଜନୀରାଣୀ ଖଟୁଆଙ୍କ ନାଁରେ ସୋସିଆଲ ମିଡ଼ିଆରେ ଅଡ଼ିଓ ଭାଇରାଲ କରି ମିଥ୍ୟା ବଦନାମ କରିବା ଅଭିଯୋଗରେ ଆନନ୍ଦପୁର ଥାନାରେ ଅଧ୍ୟକ୍ଷାଙ୍କ ପକ୍ଷରୁ ଏତଲା ଦିଆଯାଇଛି। ଅଧ୍ୟକ୍ଷା ବୁଧବାର ନିଜ ନାଁରେ ସୋସିଆଲ ମିଡିଆରେ ମିଥ୍ୟା ଅଡ଼ିଓ ବା ଚାପରେ ବଦନାମ କରାଯିବା ଘଟଣାକୁ ନେଇ ନିଜ ବାସଭବନରେ ଏକ ସାମ୍ବାଦିକ ସମ୍ମିଳନୀ କରିଥିଲେ। ସେ ଜଣେ ସରଳ ନିରୀହ ଆଦିବାସୀ ସମ୍ପ୍ରଦାୟର ମହିଳା ଅଧ୍ୟକ୍ଷା ଭାବେ ସୁପରିଚିତ ଥିବାବେଳେ ତାଙ୍କୁ ହୀନ ଉଦ୍ଦେଶ୍ୟମୂଳକ ଭାବେ ଶାସକ ଦଳର ଜଣେ ବରିଷ୍ଠ ନେତା ରମାକାନ୍ତ ବେହେରା ବଦନାମ କରିବା ନେଇ ମିଥ୍ୟା ଅଡ଼ିଓ ଭାଇରାଲ କରିଛନ୍ତି। ଏହି ଘଟଣା ନେଇ ସେ ନିଜକୁ ଅସୁରକ୍ଷିତ ମନେ କରୁଥିବାବେଳେ ଏହାର ଉପଯୁକ୍ତ ତଦନ୍ତ କରାଯାଇ ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଆନନ୍ଦପୁର ଥାନା ଅଧିକାରୀ ଲକ୍ଷ୍ମୀକାନ୍ତ ପ୍ରଧାନଙ୍କ ନିକଟରେ ଏକ ଲିଖିତ ଅଭିଯୋଗ କରିଛନ୍ତି। ଏହି ଘଟଣା ନେଇ ଆନନ୍ଦପୁର ପୌରାଞ୍ଚଳରେ ଅସନ୍ତୋଷ ପ୍ରକାଶ ପାଇବା ସହିତ ଜଣେ ମହିଳାଙ୍କୁ ଅଶୋଭନୀୟ ବ୍ୟବହାରର ଅଡ଼ିଓ ଭାଇରାଲ କରିବାକୁ ବୃଦ୍ଧିଜୀବୀ ମହଲରେ ନାପସନ୍ଦ କରାଯାଇଛି।
Popular Categories
Previous article
Next article