ରହିତାଦେଶ ନଥାଇ ନିର୍ବାଚନ ପ୍ରକ୍ରିୟା ବନ୍ଦ କାହା ସ୍ୱାର୍ଥରେ

କେନ୍ଦୁଝରଗଡ଼ : ରାଜ୍ୟର ପ୍ରମୁଖ ବିତ୍ତଶାଳୀ କେନ୍ଦୁଝର ଜିଲା ଟ୍ରକ ମାଲିକ ସଂଘ କର୍ମକର୍ତ୍ତା ନିର୍ବାଚନ ହାଇକୋର୍ଟଙ୍କ ଆଦେଶ ମୁତାବକ ଜିଲା ପ୍ରଶାସନ ପକ୍ଷରୁ ଭୋଟର ତାଲିକା ପ୍ରକାଶ ସହ ଅଗଷ୍ଟ ୧୩ ତାରିଖରେ ବିଜ୍ଞପ୍ତି ପ୍ରକାଶ ପାଇ ପ୍ରାର୍ଥୀପତ୍ର ଦାଖଲ ଓ ପ୍ରାର୍ଥୀପତ୍ର ପ୍ରତ୍ୟାହାର ମଧ୍ୟ ଶେଷ ହୋଇସାରିଛି। ପ୍ରାର୍ଥୀପତ୍ର ପ୍ରତ୍ୟାହାର ପରେ ବିଜ୍ଞପ୍ତି ମୁତାବକ ସେପ୍ଟେମ୍ବର ୩ ତାରିଖ ଚୂଡାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବାକୁ ଥିବାବେଳେ ଅତିରିକ୍ତ ଜିଲାପାଳଙ୍କ ଦ୍ୱାରା ପ୍ରକାଶିତ ଭୋଟର ତାଲିକାକୁ ଚ୍ୟାଲେଞ୍ଜ କରି ସଂଘ ସଦସ୍ୟ ଛବୀନ୍ଦ୍ର କୁମାର ଜେନା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଗ୍ରହଣ କରି ଅଗଷ୍ଟ ୩୧ ତାରିଖରେ ଶୁଣାଣୀ ଆରମ୍ଭ ହୋଇ ସେପ୍ଟମ୍ବର ୪ ତାରିଖକୁ ପରବର୍ତ୍ତୀ ଶୁଣାଣୀ ନିମନ୍ତେ ସ୍ଥିରୀକୃତ ହୋଇଥିବାରୁ ଆଡଭୋକେଟ ଜେନେରାଲ ଓଡିଶା, କଟକଙ୍କ କାର୍ଯ୍ୟାଳୟ ଚିଠି ନଂ୪୮୮୮୭(୨) ତା ୩୧/୦୮/୨୦୨୩ରିଖ ଯୋଗେ ଅତିରିକ୍ତ ସରକାରୀ ଅଧିବକ୍ତା ପ୍ରଭାତ କୁମାର ମୁଦୁଲିଙ୍କ ଦସ୍ତଖତ ଥାଇ ଜିଲାପାଳ ଓ ଅତିରିକ୍ତ ଜିଲାପାଳଙ୍କୁ ସେପ୍ଟେମ୍ବର ୪ ତାରିଖ ଶୁଣାଣୀ ପର୍ଯ୍ୟନ୍ତ କେନ୍ଦୁଝର ଜିଲା ଟ୍ରକ ମାଲିକ ସଂଘ ନିର୍ବାଚନ ସଂକ୍ରାନ୍ତ କୌଣସି ପଦକ୍ଷେପ ଗ୍ରହଣ ନକରିବାକୁ ଆଦେଶ କରିଥିଲେ। ଏହି ଆଦେଶ ପରେ ତୁରନ୍ତ ଅତିରିକ୍ତ ଜିଲାପାଳଙ୍କ ଚିଠି ନଂ୨୯୫୦ ତା ୧/୮/୨୦୨୩ରିଖ ଅନୁଯାୟୀ ସେପ୍ଟେମ୍ବର ୪ ତାରିଖ ପର୍ଯ୍ୟନ୍ତ ନିର୍ବାଚନ ସଂକ୍ରାନ୍ତୀୟ କୌଣସି ପଦକ୍ଷେପ ଗ୍ରହଣ ନକରିବାକୁ ସଂଘ ଉପଦେଷ୍ଟାଙ୍କୁ ଚିଠି କରିବା ପରେ ସେପ୍ଟେମ୍ବର ୩ ତାରିଖରେ ପ୍ରକାଶିତ ହେବାକୁଥିବା ଚୂଡାନ୍ତ ପ୍ରାର୍ଥୀ ତାଲିକାକୁ ଆଉ ପ୍ରକାଶ କରାଗଲା ନାହିଁ। ସେପ୍ଟେମ୍ବର ୪ତାରିଖରେ ଆବେଦନର ଶୁଣାଣୀ ନହୋଇ ସେପ୍ଟେମ୍ବର ୧୨ ତାରିଖକୁ ପରବର୍ତ୍ତୀ ଶୁଣାଣୀ ନିମନ୍ତେ ଧାର୍ଯ୍ୟ କରାଯାଇଥିବା ବେଳେ ୧୨ତାରିଖରେ ମଧ୍ୟ ଶୁଣାଣୀ ନହୋଇ ସେପ୍ଟେମ୍ବର ୧୩ ତାରିଖକୁ ପରବର୍ତ୍ତୀ ଶୁଣାଣୀ ନିମନ୍ତେ ଧାର୍ଯ୍ୟ ହୋଇଥିଲେ ହେଁ ୧୩ରେ ଶୁଣାଣୀ ନହୋଇ ପୁଣିଥରେ ସେପ୍ଟେମ୍ବର ୧୮ତାରିଖକୁ ଧାର୍ଯ୍ୟ ହୋଇଛି। ନିର୍ବାଚନ ପ୍ରକ୍ରିୟାକୁ ସେପ୍ଟେମ୍ବର ୪ତାରିଖ ପର୍ଯ୍ୟନ୍ତ ବନ୍ଦ କରିବାକୁ ଅତିରିକ୍ତ ଜିଲାପାଳ ସଂଘ ଉପଦେଷ୍ଟାଙ୍କୁ ଚିଠି କରିଥିବା ବେଳେ ପରବର୍ତ୍ତୀ ସମୟରେ ଜିଲା ପ୍ରଶାସନ କିମ୍ବା ଅଦାଲତଙ୍କ ପକ୍ଷରୁ ନିର୍ବାଚନ ପ୍ରକ୍ରିୟା ବନ୍ଦ ପାଇଁ କୌଣସି ରହିତାଦେଶ ନଥାଇ ସୁଦ୍ଧା କାହା ସ୍ୱାର୍ଥରେ ନିର୍ବାଚନ ପ୍ରକ୍ରିୟାକୁ ବନ୍ଦ ରଖାଯାଇଛି ସେ ନେଇ ସଂଘର ବରିଷ୍ଠ ସଦସ୍ୟ ତଥା ସଭାପତି ପ୍ରାର୍ଥୀ ରାମଚନ୍ଦ୍ର ଭୂୟାଁ ପ୍ରଶ୍ନ କରିଛନ୍ତି।

ଗୁରୁବାର  ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଯୋଗଦେଇ ଶ୍ରୀ ଭୂୟାଁ ଏହି ପ୍ରଶ୍ନ କରିବା ସହ ପୂର୍ବ ବିଜ୍ଞପ୍ତି ଅନୁଯାୟୀ ଚଳିତମାସ ୨୪ତାରିଖରେ ଭୋଟଗ୍ରହଣ କିଭଳି କରାଯିବ ସେ ନେଇ ଉଭୟ ଜିଲା ପ୍ରଶାସନ ଓ ସଂଘ ଉପଦେଷ୍ଟାଙ୍କୁ ଅନୁରୋଧ କରିଛନ୍ତି। ଅନ୍ୟମାନଙ୍କ ମଧ୍ୟରେ ସଂଘର ଅନ୍ୟତମ ବରିଷ୍ଠ ସଦସ୍ୟ ତଥା ଉପସଭାପତି ପ୍ରାର୍ଥୀ ରାମଚନ୍ଦ୍ର ରାଉତ ଓ ଯୁଗ୍ମସମ୍ପାଦକ ପ୍ରାର୍ଥୀ ଅୟସକାନ୍ତ ପଟ୍ଟନାୟକ ମଧ୍ୟ ଏହି ସାମ୍ବାଦିକ ସମ୍ମିଳନୀରେ ଯୋଗଦେଇ ରହିତାଦେଶ ନଥାଇ କିଭଳି ନିର୍ବାଚନ ପ୍ରକ୍ରିୟାକୁ ବନ୍ଦ କରାଯାଇ ଗଣତନ୍ତ୍ରରେ ସଂଘୀୟ ବ୍ୟବସ୍ଥାକୁ ଉଲଂଘନ କରାଉଛି ସେ ନେଇ କ୍ଷୋଭ ପ୍ରକଟ କରିବା ସହ ପ୍ରକାଶିତ ବିଜ୍ଞପ୍ତି ଅନୁଯାୟୀ ଧାର୍ଯ୍ୟ ସମୟରେ ନିର୍ବାଚନ ଅନୁଷ୍ଠିତ କରିବା ପାଇଁ ଅନୁରୋଧ କରିଛନ୍ତି ।