ନୂଆଦିଲ୍ଲୀ : ଏକଦା ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ପ୍ରମୁଖ ସମାଲୋଚକ ଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଏବେ ତାଙ୍କୁ ସ୍ମରଣ କରୁଛନ୍ତି। ଦେଶବାସୀ ମହମୋହନଙ୍କ ଭଳି ଜଣେ ଶିକ୍ଷିତ ପ୍ରଧାନମନ୍ତ୍ରୀଙ୍କୁ ଝୁରୁଛନ୍ତି ବୋଲି କେଜରିୱାଲ ଗୁରୁବାର ଟ୍ୱିଟ୍ କରିଛନ୍ତି। ଭାରତୀୟ ଅର୍ଥନୀତି ଉପରେ ଏକ ସ୍ତମ୍ଭ ଟ୍ୱିଟ୍ କରି ସେ ଉଲ୍ଲେଖ କରିଛନ୍ତି ଯେ ଦେଶର ପ୍ରଧାନମନ୍ତ୍ରୀ ବାସ୍ତବରେ ଜଣେ ଶିକ୍ଷିତ ବ୍ୟକ୍ତି ହେବା ଉଚିତ ବୋଲି ଦେଶବାସୀଙ୍କ ହୃଦବୋଧ ହେବା ଆବଶ୍ୟକ। ଆମ୍ ଆଦ୍ମୀ ପାର୍ଟି ଜାତୀୟ ଆବାହକ କେଜରିୱାଲ ସମ୍ପ୍ରତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ତାଙ୍କ ନେତୃତ୍ୱାଧୀନ ସରକାରଙ୍କୁ କ୍ରମାଗତ ଭାବେ ସମାଲୋଚନା କରିଆସୁଛନ୍ତି। ଏହି ପରିପ୍ରେକ୍ଷୀରେ ସେ ମନମୋହନଙ୍କ ପ୍ରସଙ୍ଗ ଉଠାଇଛନ୍ତି; କିନ୍ତୁ ପୂର୍ବରୁ କଂଗ୍ରେସ ନେତୃତ୍ୱାଧୀନ ଉପା ସରକାର ଦୁର୍ନୀତି ରୋକିବାରେ ବିଫଳ ହୋଇଥିବା ଦର୍ଶାଇ ସେ ମନମୋହନଙ୍କୁ କଡ଼ା ସମାଲୋଚନା କରିଥିଲେ। ଏବେ ତାଙ୍କ ମନୋଭାବରେ ପରିବର୍ତ୍ତନ ଘଟିଛି। ନିକଟରେ କର୍ଣ୍ଣାଟକ ମୁଖ୍ୟମନ୍ତ୍ରୀ ଭାବେ ଏଚ୍.ଡି. କୁମାରସ୍ୱାମୀଙ୍କ ଶପଥ ଗ୍ରହଣ ଉତ୍ସବରେ ତାଙ୍କୁ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଏବଂ ଉପା ଅଧ୍ୟକ୍ଷା ସୋନିଆ ଗାନ୍ଧିଙ୍କ ସହିତ ଗୋଟିଏ ମଞ୍ଚ ଉପରେ ଦେଖିବାକୁ ମିଳିଥିଲା।
