ପାଟଣା : କେନ୍ଦୁଝର ଜିଲ୍ଲା ସାହାରପଡା ବ୍ଲକ ଅଧିନସ୍ଥ ମାଛଗଡ଼ ଅଞ୍ଚଳରେ ବୁଧବାର ଅପରାହ୍ନ ସମୟରେ ପବନ, ଘଡ଼ଘଡ଼ି ସହିତ ପ୍ରବଳ ବର୍ଷା ହୋଇଥିଲା। ତେବେ କାଳ ବୈଶାଖୀ ଏତେ ପ୍ରଭାବଶାଳୀ ଥିଲା ଯେ କିଛି ସମୟ ଭିତରେ ବହୁ କ୍ଷୟକ୍ଷତି କରି ଚାଲିଗଲା । ସେହି ଅଞ୍ଚଳର ବହୁ ଲୋକଙ୍କ ଘରର ଛପର ଏବଂ ଗଛ ପଡ଼ି ଘର ଭାଙ୍ଗି ପଡିଛି, ସେପଟେ ବର୍ଷା ପାଣି ପଶି ଘର ଭିତରେ ଥିବା ଧାନ, ଚାଉଳ ଏବଂ ଆସବା ପତ୍ର ଭିଜି ନଷ୍ଟ ହୋଇ ଯାଇଛି । ମାଛଗଡ଼ ପଞ୍ଚାୟତ ଅଞ୍ଚଳ ଗ୍ରାମ ଗୁଡିକରେ ବ୍ୟାପକ କ୍ଷୟକ୍ଷତି ହୋଇଥିବା ବେଳେ ଗାଁ ଗହଳି ଓ ମୁଖ୍ୟ ରାସ୍ତା ଉପରେ ବିଦ୍ୟୁତ ତାର ଏବଂ ଗଛ ପଡ଼ି ରାସ୍ତା ଅବରୋଧ ହୋଇଛି । ଖବର ପାଇ ସାହାରପଡା ଅଗ୍ନିଶମ ବିଭାଗର କର୍ମଚାରୀ ପହଞ୍ଚି ଗଛ ଗୁଡିକୁ ରାସ୍ତାରୁ ଏବଂ ଘର ଉପରେ ପଡ଼ିଥିବା ଗଛକୁ ହଟାଇବାକୁ ଉଦ୍ୟମ ଜାରି ରଖିଛନ୍ତି । ବହୁ ଗାଡ଼ି ଉପରେ ଗଛ ଡାଳ ପଡ଼ି ଗାଡ଼ିର କ୍ଷତି ହୋଇଥିବା ବେଳେ ବହୁ ଆଦିବାସୀ ପରିବାର ଏଥିରେ ପ୍ରଭାବିତ ହୋଇଛନ୍ତି । ଯଥାଶୀଘ୍ର ସ୍ଥାନୀୟ ପ୍ରଶାସନ କ୍ଷୟକ୍ଷତି ଆକଳନ କରି ସହାୟତା ଯୋଗାଇ ଦେବାକୁ ସାଧାରଣରେ ଦାବି ହେଉଛି।
Comments are closed.