ସମାଜ ଡିଜିଟାଲ ଡେସ୍କ: ରାମାୟଣର ଏକ ବିଷୟବସ୍ତୁକୁ ବ୍ୟଙ୍ଗାତ୍ମକ ଢଙ୍ଗରେ ଚିତ୍ରଣ କରିଛନ୍ତି ଆଇଆଇଟି ବମ୍ବେରେ ଛାତ୍ରଛାତ୍ରୀ। ଗତ ମାର୍ଚ୍ଚ ୩୧ରେ ଅନୁଷ୍ଠାନର ବାର୍ଷିକ ଉତ୍ସବରେ କିଛି ଛାତ୍ରଛାତ୍ରୀ ମିଶି ଏକ ନାଟକ ମଞ୍ଚସ୍ଥ କରିଥିଲେ, ଯାହା ପବିତ୍ର ହିନ୍ଦୁ ଗ୍ରନ୍ଥ୍ ରାମାୟଣର ଏକ ବିଷୟବସ୍ତୁ ଉପରେ ଆଧାରିତ ଥିଲା। ଏହାର କିଛି ଭିଡିଓ କ୍ଲିପ ସାମାଜିକ ଗଣମାଧ୍ୟମରେ ପ୍ରକାଶ ପାଇବା ପରେ ବିଭିନ୍ନ ମହଲରେ ନିନ୍ଦା କରାଯିବା ସହିତ ଆଇଆଇଟି ବମ୍ବେ କର୍ତ୍ତୃପକ୍ଷଙ୍କୁ ଲିଖିତ ଆକାରରେ ଅଭିଯୋଗ ପଠାଯାଇଥିଲା। ଏହା ଉପରେ ବିଚାର କରିବା ଲାଗି ଏକ ଶୃଙ୍ଖଳା କମିଟି ଗଠନ କରାଯାଇଥିଲା। କମିଟିର ସୁପାରିସ କ୍ରମେ କାର୍ଯ୍ୟାନୁଷ୍ଠାନ ସ୍ୱରୂପ ଅନୁଷ୍ଠାନ ପକ୍ଷରୁ ନାଟକ ମଞ୍ଚସ୍ଥ କରିଥିବା ଛାତ୍ରଛାତ୍ରୀଙ୍କୁ ଜରିମାନା ସହିତ ଦଣ୍ଡିତ କରାଯାଇଛି।
ଦଣ୍ଡ ସ୍ୱରୂପ ୮ ଛାତ୍ରଛାତ୍ରୀଙ୍କୁ ୧ ଲକ୍ଷ ୨୦ ହଜାର ଟଙ୍କା ଲେଖାଏ ଜରିମାନା କରାଯାଇଛି। ଏହା ସହିତ ଅନ୍ୟ ଛାତ୍ରଛାତ୍ରୀଙ୍କୁ ୪୦ ହଜାର ଟଙ୍କା ଜରିମାନା କରାଯାଇଛି। ଏହା ସହିତ ସେମାନଙ୍କୁ ହଷ୍ଟେଲରେ ରହିବା ସୁବିଧା ଉପରେ କଟକଣା ଲାଗୁ ହୋଇଛି। ଜଣେ ଅଭିଯୋଗକାରୀ କହିଛନ୍ତି, ଏହି ନାଟକରେ ରାମାୟଣ ପ୍ରତି ଅନେକ ପ୍ରକାର ଅପମାନଜନକ ଦୃଶ୍ୟ ରହିଛି। ଛାତ୍ରଛାତ୍ରୀମାନେ ଆମ ସଂସ୍କୃତିର ଉପହାସ କରିଛନ୍ତି।
ଅନ୍ୟ ଜଣେ ବ୍ୟକ୍ତି ସାମାଜିକ ଗଣମାଧ୍ୟମରେ ଲେଖିଛନ୍ତି, ଛାତ୍ରଛାତ୍ରୀମାନେ ନିଜ ଶିକ୍ଷାଗତ ସ୍ୱାଧୀନତାର ଅପବ୍ୟବହାର କରିଛନ୍ତି। କୌଣସି ଧର୍ମକୁ ଯେପରି ବିଦ୍ରୁପ ଭାବରେ ଉପସ୍ଥାପନ କରା ନ ଯାଏ ସେଥିପ୍ରତି ଅନୁଷ୍ଠାନ ପକ୍ଷରୁ ମାର୍ଗଦର୍ଶିକା ଜାରି କରାଯିବା ଦରକାର।
