ଡେସ୍କ: ଆଜି ସାରା ଦେଶରେ ରଙ୍ଗର ପର୍ବ ହୋଲି ଆନନ୍ଦ ଉଲ୍ଲାସର ସହ ପାଳନ କରାଯାଉଛି। ବସନ୍ତ ଋତୁର ଆଗମନରେ ପାଳନ କରାଯାଉଥିବା ଏହି ପର୍ବ ମନ୍ଦ ଉପରେ ଭଲର ବିଜୟକୁ ସୂଚିତ କରିଥାଏ। ଲୋକମାନେ ପରସ୍ପରକୁ ରଙ୍ଗ ଲଗାଇବା ସହ ଅଭିବାଦନ ପୂର୍ବକ ମିଠା ଖୁଆଇ ଏହି ପର୍ବ ପାଳନ କରୁଛନ୍ତି।
ରାଷ୍ଟ୍ରପତି ଦ୍ରୌପଦୀ ମୁର୍ମୁ ହୋଲି ପର୍ବ ପାଳନ ଅବସରରେ ଦେଶବାସୀଙ୍କ ଶୁଭେଚ୍ଛା ଜଣାଇଛନ୍ତି। ଏକ ବାର୍ତ୍ତାରେ ସେ ହୋଲି ପର୍ବ ସ୍ନେହ ଏବଂ ଭାଇଚାରାର ପର୍ବ ବୋଲି କହିଛନ୍ତି ଏବଂ ଏହା ଦେଶର ବିବିଧତା ଏବଂ ସମନ୍ୱୟର ପ୍ରତୀକ ବୋଲି କହିଛନ୍ତି। ସେ କହିଛନ୍ତି ଯେ ଏହି ରଙ୍ଗର ପର୍ବ ସମସ୍ତଙ୍କ ଜୀବନରେ ସୁଖ, ସମୃଦ୍ଧତା ଏବଂ ନୂତନ ଶକ୍ତି ଆଣିବ।
ଏହି ଅବସରରେ ଶୁଭେଚ୍ଛା ଜଣାଇ ଉପ-ରାଷ୍ଟ୍ରପତି ଜଗଦୀପ ଧନଖଡ଼ କହିଛନ୍ତି ଯେ ହୋଲି ହେଉଛି ଜୀବନର ଉତ୍ସବ ଏବଂ ମନ୍ଦ ଉପରେ ଭଲର ବିଜୟ। ସେ ଆହୁରି ମଧ୍ୟ କହିଛନ୍ତି ଯେ ହୋଲିର ରଙ୍ଗୀନ ରଙ୍ଗ ଦେଶର ସଂସ୍କୃତିର ସମୃଦ୍ଧତା ଏବଂ ଏହାର ଲୋକଙ୍କ ବିବିଧତାକୁ ମନେ ପକାଇଥାଏ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ହୋଲି ଅବସରରେ ଶୁଭେଚ୍ଛା ଜଣାଇଛନ୍ତି। ଏକ ଟୁଇଟ୍ରେ ଶ୍ରୀ ମୋଦୀ ସମସ୍ତଙ୍କ ଜୀବନରେ ଆନନ୍ଦ ଏବଂ ଉତ୍ସାହର ରଙ୍ଗ ସବୁବେଳେ ବରଷି ଯାଉ ବୋଲି କହିଛନ୍ତି।
ଅନ୍ୟ ପକ୍ଷରେ, ହୋଲି ଅବସରରେ ରେଳ ଯାତ୍ରୀମାନଙ୍କ ସୁବିଧା ତଥା ଯାତ୍ରୀ ଭିଡ଼ ହ୍ରାସ କରିବା ପାଇଁ ଭାରତୀୟ ରେଳ ୧୯୬ଟି ସ୍ୱତନ୍ତ୍ର ଟ୍ରେନ ଚଳାଇଛି ଓ ଏହା ୪୯୧ଟି ଟ୍ରିପ କରିବ। ଏହି ଟ୍ରେନ୍ ଗୁଡିକ ଦିଲ୍ଲୀ- ପାଟନା, ଗୋରଖପୁର- ମୁମ୍ବାଇ, ଗୁଆହାଟି- ରାଞ୍ଚି, ଜୟପୁର- ବାନ୍ଦ୍ରା ଟର୍ମିନାସ୍ ଏବଂ ପୁଣେ-ଦାନପୁର ସମେତ ଦେଶର ପ୍ରମୁଖ ଗନ୍ତବ୍ୟସ୍ଥଳକୁ ସଂଯୋଗ କରିବ।ଯାତ୍ରୀମାନଙ୍କ ସୁରକ୍ଷା ସୁନିଶ୍ଚିତ କରିବା ପାଇଁ ପ୍ରମୁଖ ଷ୍ଟେସନରେ ଅତିରିକ୍ତ ରେଳ ସୁରକ୍ଷା ବଳ କର୍ମଚାରୀ ନିୟୋଜିତ ହୋଇଛନ୍ତି।
Comments are closed.