ଗୁରୁଡ଼ିଝାଟିଆ: ସମାଜସେବୀ, ରାଜନେତା ତଥା ଶ୍ରୀରାମ ବରିଷ୍ଠ ନାଗରିକ ସଂଘ, ନଦୀକୂଳ କଖଡିର ସଭାପତି ଭାଗିରଥି ସାହୁ(୭୯)ଙ୍କ ପରଲୋକ ଘଟିଛି। ହଠାତ୍ ଅସୁସ୍ଥତା ଅନୁଭବ କରିବାରୁ ମାଧବପୁର ଗୋପବନ୍ଧୁ ଚିକିତ୍ସାଳୟ ଓ ପରେ ଅଧିକ ଗୁରୁତର ହୋଇପଡ଼ିବାରୁ କଟକ ବଡମେଡିକାଲରେ ମଙ୍ଗଳବାର ସନ୍ଧ୍ୟାରେ ଭର୍ତ୍ତି ହୋଇଥିଲେ। ବିଳମ୍ବିତ ରାତିରେ ସ୍ୱର୍ଗତ ସାହୁଙ୍କ ପରଲୋକ ଘଟିଥିବା ଜଣାପଡ଼ିଛି। ସ୍ୱର୍ଗତ ସାହୁ ଆଠଗଡ଼ ନିର୍ବାଚନ ମଣ୍ଡଳୀ ଟାଙ୍ଗି-ଚୌଦ୍ୱାର ବ୍ଲକ ଅନ୍ତର୍ଗତ କଖଡି ପଞ୍ଚାୟତରେ ୮୦ଦଶକରେ ୨ଥର ସରପଞ୍ଚ ଭାବରେ ବହୁ ଲୋକାଭିମୁଖି କାର୍ଯ୍ୟ କରିଥିଲେ। ବନ୍ୟାର ସ୍ଥାୟୀ ପ୍ରତିକାର, ଜନସାଧାରଣଙ୍କୁ ରିଲିଫ ପ୍ରଦାନ,ଜଳସେଚନ ବ୍ୟବସ୍ଥା କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିଥିଲେ। ସମଗ୍ର ଆଠଗଡ଼, ଚୌଦ୍ୱାର, କଟକ, ରାଜଧାନୀ ଭୁବନେଶ୍ୱର, ପୁରୀ ଆଜି ଜିଲ୍ଲାରେ ତାଙ୍କର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ। ଅଧୁନା ଶ୍ରୀରାମ ବରିଷ୍ଠ ନାଗରିକ ସଂଘ ନଦୀକୂଳ କଖଡିର ସଭାପତି ଭାବରେ ସମାଜସେବାରେ ନିୟୋଜିତ କରିଥିଲେ।
ଲୋକ ସେବକ ମଣ୍ଡଳ ଓଡ଼ିଶା ଶାଖା ଅଧ୍ୟକ୍ଷ ତଥା ‘ସମାଜ’ର ପ୍ରକାଶକ ମୁଦ୍ରାକର ନିରଞ୍ଜନ ରଥ ସ୍ୱର୍ଗତ ସାହୁଙ୍କ ପରଲୋକରେ ବ୍ୟଥିତ ହେବା ସହ ଶୋକ ବ୍ୟକ୍ତ କରିଛନ୍ତି। ସ୍ୱର୍ଗତ ସାହୁ ଜଣେ ପରୋପକାରୀ, ସଂଗଠକ ଓ ସମାଜିକ କ୍ଷେତ୍ରରେ ଜଣାଶୁଣା ବ୍ୟକ୍ତିତ୍ୱ ଥିଲେ ବୋଲି ଶ୍ରୀ ରଥ କହିଥିଲେ। ମୃତ୍ୟୁ ଶଯ୍ୟା ନିକଟରେ ଆତ୍ମୀୟ ସ୍ୱଜନ, ବନ୍ଧୁ ଓ ପରିଜନ ଉପସ୍ଥିତ ଥିଲେ। ଗାଁ ଶ୍ମଶ୍ମାନରେ ଅନ୍ତ୍ୟୋଷ୍ଟିକ୍ରିୟା ସମାପନ ହୋଇଥିବା ବେଳେ ସୁରଜ କୁମାର ସାହୁ ମୁଖାଗ୍ନି ଦେଇଥିଲେ।
Comments are closed.