ସମାଜ ଡିଜିଟାଲ ଡେସ୍କ: ମାଓବାଦୀ ତିଆରି କରୁଥିଲେ ବନ୍ଧୁକ, ବୋମା। କୋମ୍ବିଂ ଅପରେସନ ବେଳେ ଏଭଳି ଏକ ଗୋଳାବାରୁଦ କାରଖାନା ଠାବ କରିଛନ୍ତି ଯବାନ। ମାଲକାନଗିରି ସୀମାନ୍ତ ଛତିଶଗଡ଼ର ସୁକମା ଜିଲା ଅନ୍ତର୍ଗତ ଗରିଆବନ୍ଧ ଜଙ୍ଗଲରୁ ଏହି କାରଖାନାକୁ ଠାବ କରିଛନ୍ତି କୋବ୍ରା ବାହିନୀ ଏବଂ ସିଆରପିଏଫ ଯବାନ।
ସୁକମା ଜିଲାର ଗରିଆବନ୍ଧ ଓ ଏହାର ଆଖପାଖ ଜଙ୍ଗଲରେ ଗୁଳିବିନିମୟ ଘଟି ୧୪ ମାଓବାଦୀ ନିହତ ହୋଇଥିଲେ। ଏହା ପରଠାରୁ ସେହି ଅଞ୍ଚଳରେ ଯବାନମାନଙ୍କ ପକ୍ଷରୁ କୋମ୍ବିଂ ଅପରେସନକୁ ଜୋରଦାର କରାଯାଇଥିଲା। ଏହି ସମୟରେ ଗରିଆବନ୍ଧ ଜଙ୍ଗଲରେ ମାଓବାଦୀମାନ ଚଳାଇଥିବା ଏକ କାରଖାନାକୁ ଠାବ କରିଥିଲେ ଯବାନ। ସେଠାରୁ ବହୁ ପରିମାଣର ବନ୍ଧୁକ, ଆଇଇଡି, ବୋମା ଜବତ ହୋଇଛି। ଏପରି କି ମଲ୍ଟି ବ୍ୟାରେଲ ଗ୍ରେନେଡ ଲଞ୍ଚର ବି ମିଳିଛି। ତା’ ସହିତ ମେଡିକାଲ ସାମଗ୍ରୀ ଏବଂ ଜେନେରେଟର ମିଳିଛି।
