ନୂଆଦିଲ୍ଲୀ: ଅର୍ଥ ନିବେଶ କରି ଅଧିକ ରିଟର୍ନ ବା ଲାଭ ପାଇବାକୁ ସମସ୍ତେ ଇଚ୍ଛୁକ ଥାଆନ୍ତି। କିନ୍ତୁ କେଉଁ କ୍ଷେତ୍ରରେ ନିବେଶ କଲେ ଅଧିକ ରିଟର୍ନ ମିଳିବ ତାହା ଅନେକେ ବୁଝିପାରି ନ ଥାନ୍ତି। କେହି କେହି ଶେୟାର ମାର୍କେଟରେ ନିବେଶ କରନ୍ତି ତ ଆଉ କେହି ରିୟଲ ଇଷ୍ଟେଟ କିମ୍ବା ଅନ୍ୟାନ୍ୟ କ୍ଷେତ୍ରରେ ନିବେଶ କରନ୍ତି। କିନ୍ତୁ ସବୁଠି ସମାନ ରିଟର୍ନ ମିଳି ନ ଥାଏ। ତେବେ ଆସନ୍ତୁ ଜାଣିବା ବିଗତ ୫ବର୍ଷ ଭିତରେ କେଉଁଥିରେ ନିବେଶ ଅଧିକ ଫଳପ୍ରଦ ହୋଇଛି, ଭଲ ରିଟର୍ନ ଦେଇଛି। ସୁନା ନା ଶେୟାର ବଜାର ?
ତଥ୍ୟ ଅନୁସାରେ, ଗତ ୫ ବର୍ଷରେ ସୁନାରେ ନିବେଶ କରିଥିବା ନିବେଶକଙ୍କୁ ବାର୍ଷିକ ୧୮ ପ୍ରତିଶତ ରିଟର୍ନ ମିଳିଛି। ଏହି ସମୟ ମଧ୍ୟରେ ଶେୟାର ବଜାର ଅର୍ଥାତ ନିଫ୍ଟିରେ ବାର୍ଷିକ ୧୫ ପ୍ରତିଶତ ରିଟର୍ନ ଆସିଛି। ତେବେ ଗତ ଏକ ବର୍ଷ, ୩ ବର୍ଷ, ୧୦ ବର୍ଷ ଏବଂ ୧୫ ବର୍ଷର ତଥ୍ୟକୁ ହିସାବକୁ ନେଲେ ନିଫ୍ଟି ଶେୟାର ସୁନାକୁ ପଛରେ ପକାଇ ଦେଇଛି। ଗତ ୭ ବର୍ଷର ଅବଧିରେ ଉଭୟ କ୍ଷେତ୍ରରେ ରିଟର୍ନ ପାଖାପାଖି ସମାନ ରହିଛି। ଏହି ସମୟରେ ନିଫ୍ଟି ୧୫ ପ୍ରତିଶତ ରିଟର୍ନ ଦେଇଥିବାବେଳେ ସୁନାରେ ନିବେଶ ରିଟର୍ନ ୧୪ ପ୍ରତିଶତ ରହିଛି। ଆମ୍ବିଟ ଗ୍ଲୋବାଲ ପ୍ରାଇଭେଟ କ୍ଲାଏଣ୍ଟ ସିଇଓ ଅମୃତା ଫରମାନଙ୍କ ଏକ ରିପୋର୍ଟରେ ଏହି ତଥ୍ୟ ପ୍ରକାଶ କରାଯାଇଛି।
ସୂଚନାଯୋଗ୍ୟ, ଚଳିତବର୍ଷ ଏପ୍ରିଲ ପ୍ରଥମ ସପ୍ତାହ ସୁଦ୍ଧା ଘରୋଇ ବଜାରରେ ୨୨ କ୍ୟାରାଟ ସୁନା ଦର ୧୦ ଗ୍ରାମ ପ୍ରତି ୭୦ ହଜାର ଛୁଇଁଥିଲା। ଏବେ ସୁନା ମୂଲ୍ୟ ସାମାନ୍ୟ ହ୍ରାସ ପାଇ ୨୨ କ୍ୟାରାଟ ସୁନା ୧୦ ଗ୍ରାମ ପିଛା ପାଖାପାଖି ୬୭ ହଜାର ରହିଛି। ବିଭିନ୍ନ ଦେଶର କେନ୍ଦ୍ରୀୟ ବ୍ୟାଙ୍କଗୁଡ଼ିକ ସୁନା କିଣିବା ଉପରେ ଗୁରୁତ୍ଵ ଦେଉଥିବାରୁ ଏହାର ମୂଲ୍ୟ ଦ୍ରୁତଗତିରେ ବୃଦ୍ଧି ପାଉଥିବା ଅମୃତା ଫରମାନ୍ କହିଛନ୍ତି। ଏସବୁ ବ୍ୟାଙ୍କଗୁଡ଼ିକ ମଧ୍ୟରେ ଭାରତ, ଚୀନ ଏବଂ ରୁଷ ସାମିଲ ଅଛନ୍ତି ବୋଲି ସେ କହିଛନ୍ତି।
