ପିପିଲି : ଭୁବନେଶ୍ୱର ସାଇକେଲିଂ ଆଣ୍ଡ ଆଡ୍ଭେଞ୍ଚର କ୍ଲବର ସହଯୋଗରେ ୪ଜଣ ବିଦେଶୀ ପର୍ଯ୍ୟଟକ ସାଇକେଲ ଯୋଗେ ମଙ୍ଗଳବାର ଠାରୁ ଓଡିଶା ପରିଭ୍ରମଣରେ ବାହାରିଛନ୍ତି । ଫିଲିପାଇନ୍ସ ର ମିସ୍ ରେଞ୍ଜଲ, ଜର୍ମାନର ମିଷ୍ଟର ଥୋମାସ, ମିଷ୍ଟର ଫ୍ରାଙ୍କ, ମିସ୍ ଭେରୋନା ଆଜି ସକାଳେ ଭୁବନେଶ୍ୱରରୁ ସାଇକେଲରେ ଯାତ୍ରା ଆରମ୍ଭ କରି ପ୍ରଥମେ ଶାନ୍ତି ସ୍ତୁପ ଧଉଳି ପରିଭ୍ରମଣ କରିଥିଲେ ।
ସେଠାରୁ ସେମାନେ ଜାତୀୟ ରାଜପଥରେ ପିପିଲିରେ ପହଞ୍ଚିବା ପରେ ତାଙ୍କୁ ପିପିଲି ଅଞ୍ଚଳର କେତେକ ସମାଜସେବୀ, ବରିଷ୍ଠ ନାଗରିକ ଓ କାର୍ଯ୍ୟରତ ସାମ୍ବାଦିକ ମାନେ ଫୁଲତୋଡା ଦେଇ ସ୍ୱାଗତ କରିବା ସହ ଚାନ୍ଦୁଆ ଉପହାର ଦେଇଥିଲେ । ପରେ ସ୍ଥାନୀୟ ସାମ୍ବାଦିକମାନେ ସେମାନଙ୍କୁ ପିପିଲିର ଚାନ୍ଦୁଆ ବଜାର ବୁଲି ଦେଖାଇଥିଲେ । ସେଠାରୁ ସେମାନେ କୋଣାର୍କକୁ ସାଇକେଲରେ ଯାତ୍ରା କରିଥିଲେ । ଏହି ୪ ବିଦେଶୀ ପର୍ଯ୍ୟଟକମାନେ କୋଣାର୍କରୁ ମେରାଇନ ଡ୍ରାଇଭ୍ ରାସ୍ତାରେ ପୁରୀ, ସାତପଡା, ରମ୍ଭା ଦେଇ କୋରାପୁଟ ଅଭିମୁଖେ ଯାତ୍ରା କରିବେ ବୋଲି ପ୍ରକାଶ କରିଥିଲେ । ଭୁବନେଶ୍ୱର ସାଇକେଲିଂ ଆଣ୍ଡ ଆଡ୍ଭେଞ୍ଚର କ୍ଲବର ସଦସ୍ୟ ଅଜୟ କୁମାର ନନ୍ଦ ସେମାନଙ୍କ ସହ ଏହି ସାଇକେଲ ଯାତ୍ରାରେ ସାମିଲ ରହି ସେମାନଙ୍କୁ ସହଯୋଗ କରୁଛନ୍ତି ।
