ସୁପ୍ରିମକୋର୍ଟଙ୍କୁ ଜଣାଇଲା କେନ୍ଦ୍ର; ମେଘାଳୟ ଶ୍ରମିକଙ୍କୁ ଉଦ୍ଧାରରେ ଅସୁବିଧାର ସମ୍ମୁଖୀନ ହେଉଛୁ

ନୂଆଦିଲ୍ଲୀ : ମେଘାଳୟର ପୂର୍ବ ଜୟନ୍ତିଆସ୍ଥିତ କୋଇଲା ଖଣିରେ ଫଶି ରହିଥିବା ଶ୍ରମିକଙ୍କୁ ୨୨ ଦିନ ପରେ ବି ଉଦ୍ଧାର କରାଯାଇ ପାରି ନ ଥିବା ବେଳେ ସେମାନେ ଜୀବିତ ଥିବା ନେଇ ଆଶା ମଉଳିବାରେ ଲାଗିଛି। ‌ତେବେ ସୁପ୍ରିମକୋର୍ଟ ଶୁକ୍ରବାର ଉଦ୍ଧାରକାର୍ଯ୍ୟର ଅଗ୍ରଗତି ସମ୍ବନ୍ଧରେ ରିପୋର୍ଟ ଲୋଡିଛନ୍ତି। ଖଣିଟି ବେଆଇନ ହୋଇଥିବାରୁ ଏଠାରେ ଫଶି ଯାଇଥିବା ଶ୍ରମିକଙ୍କୁ ଉଦ୍ଧାର ଲାଗି କୌଣସି ନିର୍ଦିଷ୍ଟ ବ୍ଲୁପ୍ରିଣ୍ଟ ନ ଥିବାରୁ ଉଦ୍ଧାରକାର୍ଯ୍ୟ ବାଧାପ୍ରାପ୍ତ ହେଉଥିବା ସଲିସିଟର ଜେନେରାଲ ଶୁକ୍ରବାର ଶୁଣାଣି ବେଳେ ଯୁକ୍ତି ବାଢିଥିଲେ। ଏହି ପ୍ରସଙ୍ଗ ଭିତରକୁ ଯିବାକୁ ସୁପ୍ରିମକୋର୍ଟ ଚାହୁଁନାହାନ୍ତି ବୋଲି ଦର୍ଶାଇ ବିଚାରପତି ଏ. କେ. ସିକ୍ରି କହିଥିଲେ, ଯଦି ଖଣିଟି ବେଆଇନ ତା’ହେଲେ ଆଇନଗତ କାର୍ଯ୍ୟାନୁଷ୍ଠାନ ହେବ; କିନ୍ତୁ ଏହି କାରଣରୁ ଶ୍ରମିକମାନଙ୍କ ଜୀବନକୁ ବାଜି ଲଗାଯାଇପାରିବ ନାହିଁ। ଫଶି ରହିଥିବା ଶ୍ରମିକଙ୍କୁ ଉଦ୍ଧାର ଲାଗି ଉପଯୁକ୍ତ ଉଦ୍ୟମ ହୋଇଛି କି ନାହିଁ ତାହା କୋର୍ଟ ଜାଣିବାକୁ ଚାହାନ୍ତି ବୋଲି ସେ ଦର୍ଶାଇଛନ୍ତି। ଜାନୁଆରୀ ୭ରେ ଉଦ୍ଧାରକାର୍ଯ୍ୟ ଉପରେ ଅସନ୍ତୋଷ ବ୍ୟକ୍ତି ଗରି ଏହି ଶ୍ରମିକମାନଙ୍କୁ ଜୀବନ୍ତ ଅଥବା ମୃତ ଉଦ୍ଧାର କରିବାକୁ ସୁପ୍ରିମକୋର୍ଟ ନିର୍ଦେଶ ଦେଇଥିଲେ।