ଅନୁଗୁଳ: ଏକ ସଡ଼କ ଦୁର୍ଘଟଣାରେ ସୁନ୍ଦରଗଡ଼ର ପୂର୍ବତନ ବିଧାୟକ ଯୋଗେଶ ସିଂହ ଆହତ ହୋଇଛନ୍ତି। ଯୋଗେଶ ସୁନ୍ଦରଗଡ଼ରୁ ଭୁବନେଶ୍ଵର ଆସୁଥିବାବେଳେ ଅନୁଗୁଳଠାରୁ ୧୫ କିଲୋମିଟର ଦୂର ଖନ୍ଦାନାଳୀ ନିକଟରେ ଶୁକ୍ରବାର ରାତି ପ୍ରାୟ ୩ଟାରେ ଏହି ଦୁର୍ଘଟଣା ଘଟିଛି। ତେବେ ଦୁର୍ଘଟଣା ପରେ ତାଙ୍କ କାର୍ ଜଳିଯାଇଥିବାବେଳେ ଯୋଗେଶ ଏବଂ ତାଙ୍କ ସହ ଥିବା ଅନ୍ୟ ୪ ଜଣ ଅଳ୍ପକେ ବର୍ତ୍ତି ଯାଇଛନ୍ତି। ସମସ୍ତଙ୍କୁ ଅନୁଗୁଳଠାରେ ପ୍ରାଥମିକ ଚିକିତ୍ସା କରାଯିବା ପରେ ଭୁବନେଶ୍ଵର ସ୍ଥାନାନ୍ତର କରାଯାଇଛି। ଯୋଗେଶ ଭୁବନେଶ୍ଵରର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଛନ୍ତି। ତାଙ୍କ ମୁଣ୍ଡ ଏବଂ ଆଖିପତାରେ ଆଘାତ ଲାଗିଛି।
କିପରି ଦୁର୍ଘଟଣା ଘଟିଲା ତାହା ଜଣାପଡ଼ି ନାହିଁ। ସ୍ଥାନୀୟ ଲୋକଙ୍କଠାରୁ ମିଳିଥିବା ସୂଚନା ମୁତାବକ, ଯୋଗେଶଙ୍କ କାର ଏକ ଗଛକୁ ଧକ୍କା ଦେବା ପରେ ସେଥିରେ ନିଆଁ ଲାଗିଯାଇଥିଲା। ଏହି ସମୟରେ ଉକ୍ତ ରାସ୍ତା ଦେଇ ଯାଉଥିବା ଏକ ବରଯାତ୍ରୀ ଦଳ ଗାଡ଼ି ଭିତରୁ ଆହତମାନଙ୍କୁ ଉଦ୍ଧାର କରିଥିଲେ। ଖବର ପାଇ ନିକଟ ଗାଁ ଲୋକେ ସେଠାରେ ପହଞ୍ଚି ଆହତମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଥିଲେ। ପରେ ଅଗ୍ନିଶମ କର୍ମଚାରୀମାନେ ପହଞ୍ଚି କାରରେ ଲାଗିଥିବା ନିଆଁ ଲିଭାଇଥିଲେ। ମାତ୍ର କାରଟି ସମ୍ପୂର୍ଣ୍ଣ ଜଳିଯାଇଛି।
