ଭୁବନେଶ୍ବର ରେଳ ଷ୍ଟେସନରେ ଆତଙ୍କରାଜ ଚଳାଇଛନ୍ତି ଲୁଟେରା :ଟିକଟ କାଉଣ୍ଟରରୁ ଲୁଟୁଛନ୍ତି ପର୍ସ, ନୀରବଦ୍ରଷ୍ଟା ସାଜିଛି ଜିଆରପି

ଭୁବନେଶ୍ବର : ଭୁବନେଶ୍ବର ରେଳ ଷ୍ଟେସନରେ ପୁଣି ଚୋରି ମାମଲା ସାମ୍ନାକୁ ଆସିଛି । ପୂର୍ବରୁ ଅନେକ ଥର ଷ୍ଟେସନରେ ଚୋରି ଘଟଣା ସାମ୍ନାକୁ ଆସିଥିଲେ ମଧ୍ୟ ଏଥିପ୍ରତି କାହାର ନିଘା ନାହିଁ । ସୋମବାର ସନ୍ଧ୍ୟାରେ ପ୍ଲାଟଫର୍ମରେ ଜଣେ ଯାତ୍ରୀଙ୍କ ପର୍ସ ଲୁଟିନେଇଛନ୍ତି ଲୁଟେରା । ଯାତ୍ରୀଙ୍କ ନାଁ ହୃଷିକେଶ ମିଶ୍ର । ତାଙ୍କ ଘର ଭଦ୍ରକର ମଞ୍ଜୁରି ରୋଡ୍ ସ୍ଥିତ ଖପୁରିଆପଦାରେ ବୋଲି ଜଣାପଡିଛି । ସନ୍ଧ୍ୟାରେ ସେ ଭୁବନେଶ୍ବରରୁ ଭଦ୍ରକ ଯିବା ପାଇଁ ଟିକଟ କାଉଣ୍ଟରରେ ଟିକଟ କାଟୁଥିବା ସମୟରେ ଲୁଟେରା ତାଙ୍କ ପର୍ସ ଚୋରି କରିନେଇଥିଲେ । ପର୍ସରେ ନଗଦ ୨ ହଜାର ଟଙ୍କା ଏଟିଏମ୍ କାର୍ଡ ଓ ଅନେକ ଗୁରୁତ୍ବପୂର୍ଣ୍ଣ କାଗଜପତ୍ର ଥିଲା । ତେବେ ଏନେଇ ହୃଷିକେଶ ଜିଆରପିଏସ୍ ଥାନାରେ ଅଭିଯୋଗ କରିଛନ୍ତି । ଅନ୍ୟପଟେ ପ୍ଲାର୍ଟଫର୍ମରେ ଲାଗିଥିବା ସିସିଟିଭିକୁ ଯାଞ୍ଚ କରିବା ସମୟରେ ସେଥିରୁ ଅନେକ କ୍ୟାମେରା କାମ କରୁନଥିବା ଜଣାପଡିଛି । ଏହାର ସୁଯୋଗ ନେଇ ଲୁଟେରା ଷ୍ଟେସନରେ ଆତଙ୍କରାଜ ଚଳାଇଛନ୍ତି । ଖୁବ୍ ଶୀଘ୍ର କ୍ୟାମେରା ମରାମତି କରାଯିବ ବୋଲି ବିଭାଗ ସୂଚନା ଦେଇଛି ।