ଗଞ୍ଜାମ: ଗଞ୍ଜାମ ଜିଲାର ଋଷିକୁଲ୍ୟା ମୁହାଁଣ ଅଞ୍ଚଳ ସମୁଦ୍ରରେ ବିରଳ ସାମୁଦ୍ରିକ କଇଁଛ ଅଲିଭ ରିଡଲେମାନଙ୍କ ମିଳନ ପ୍ରକ୍ରିୟା ଆରମ୍ଭ ହୋଇଥିବା ଦେଖିବାକୁ ମିଳିଛି। ସମୁଦ୍ରରେ ଯୋଡ଼ା ଯୋଡ଼ା ହୋଇ ଭାଷମାନ ଅବସ୍ଥାରେ କଇଁଛମାନଙ୍କୁ ଦେଖିବାକୁ ମିଳିଛି। ଏହି ପ୍ରକ୍ରିୟା ଆସନ୍ତା ଜାନୁଆରୀ ମାସ ଶେଷ ପର୍ଯ୍ୟନ୍ତ ଚାଲୁ ରହିବ।
ପାଗର ଅନୁକୂଳ ଅବସ୍ଥା ଆସିଲେ ଅର୍ଥାତ ଦକ୍ଷିଣା ପବନ ବହିଲେ କଇଁଛଙ୍କ ଗଣ ଅଣ୍ଡା ଦାନ (ପର୍ବ )ପ୍ରକ୍ରିୟା ଆରମ୍ଭ ହେବା ନେଇ ବିଶେଷଜ୍ଞମାନେ ମତ ଦେଇଛନ୍ତି। ବର୍ତ୍ତମାନ ଏହି ମିଳନ ପ୍ରକ୍ରିୟାକୁ ନେଇ ବନ ବିଭାଗ, ପରିବେଶବିତଙ୍କ ମଧ୍ୟରେ ଅଧିକ ଉତ୍ସାହ ପ୍ରକାଶ ପାଇଛି। ଡିଏଫଓ ଶନି ଖୋଖୋର, ଏସିଏଫ ଦିବ୍ୟ ଶଙ୍କର ବେହେରା ପ୍ରମୁଖ ଋଷିକୂଲ୍ୟା ମୁହାଣ ଅଞ୍ଚଳ ପରିଦର୍ଶନ ସହ ଅଲିଭ ରିଡଲେଙ୍କ ସୁରକ୍ଷା ନେଇ ତଦାରଖ କରିଛନ୍ତି।
ମିଳିଥିବା ସୂଚନା ଅନୁସାରେ କୂଳ ଠାରୁ ପ୍ରାୟ ପାଞ୍ଚରୁ ସାତ କିଲୋମିଟର ଦୂରରେରେ ଯୋଡ଼ା ଯୋଡ଼ା ଅଣ୍ଡିରା ଓ ମାଇ କଇଁଛଙ୍କ ମିଳନ ହୋଉଥିବା ନେଇ ଦେଖିବାକୁ ମିଳିଛି। ଡିସେମ୍ବରରୁ ଜାନୁଆରୀ ଶେଷ ବେଳକୁ ବହୁ ସଂଖ୍ୟାରେ ସାମୁଦ୍ରିକ କଇଁଛଙ୍କ ମିଳନ ପ୍ରକ୍ରିୟା ସମୁଦ୍ର ମଧ୍ୟରେ ଦେଖିବାକୁ ମିଳିବ। ଏହି ସମୟରେ ସୁରକ୍ଷା ବ୍ୟବସ୍ଥାକୁ ବଢ଼ାଇଦିଆଯାଇଛି ବୋଲି ବନ ବିଭାଗ ପକ୍ଷରୁ ସୂଚନା ମିଳିଛି। ଏହି ମିଳନ ପ୍ରକ୍ରିୟା ଶେଷ ହେବା ପରେ ପାଗର ଅନୁକୂଳ ଅବସ୍ଥା ଆସିଲେ ଅର୍ଥାତ ଦକ୍ଷିଣା ପବନ ବହିଲେ ଏହି ବିରଳ ସାମୁଦ୍ରିକ କଇଁଛମାନଙ୍କ ଗଣ ଅଣ୍ଡା ପ୍ରକ୍ରିୟା ଆରମ୍ବ ହେବ ବୋଲି ବିଶେଷଜ୍ଞ ମାନେ ମତ ଦେଇଛନ୍ତି।
ପ୍ରକାଶ ଯୋଗ୍ୟ ଯେ ୨୦୨୨ରେ ୫ ଲକ୍ଷ, ୨୦୨୩ ରେ ୬ଲକ୍ଷ ୩୭ ହଜାର କଇଁଛ ଅଣ୍ଡା ଦେଇଥିଲେ। ୨୦୨୪ରେ କୌଣସି କାରଣରୁ କଇଁଛ ଅଣ୍ଡା ଦେବାକୁ ଆସିନଥିଲେ। 2025 ରେ କଇଁଛମାନେ ବହୁ ମାତ୍ରରେ ଅଣ୍ଡା ଦେବେ ବୋଲି ସମସ୍ତେ ଆଶାବାଦୀ ରହିଛନ୍ତି।
