କୌଣସି ମନ୍ଦିର ବା ଧର୍ମସ୍ଥଳ ଏକ ପବିତ୍ର ସ୍ଥାନ ହୋଇଥାଏ। ସେହି ସ୍ଥାନ ପ୍ରତି ସମସ୍ତଙ୍କ ମନରେ ଭକ୍ତି ଓ ସମ୍ମାନ ଭରି ରହିଥାଏ। ତେଣୁ ସେହିଭଳି ସ୍ଥାନକୁ ଗଲାବେଳେ ବେଶଭୂଷା ମଧ୍ୟ ସେହିଭଳି ଭଦ୍ର ଓ ଶାଳୀନ ହେବା ଜରୁରୀ ବୋଲି ମନେ କରାଯାଏ। ସେଥିପାଇଁ ଅନେକ ଧର୍ମସ୍ଥଳରେ ବେଶଭୂଷାକୁ ନେଇ କେତେକ କଟକଣା ରହିଛି। ଚାଲନ୍ତୁ ଜାଣିବା ସେହି ସବୁ କଟକଣା ବିଷୟରେ –
ଲୁଙ୍ଗି ପିନ୍ଧି ଓ ଶାର୍ଟ ଖୋଲି ଏହି ମନ୍ଦିରରେ ପ୍ରବେଶ କରିବେ- କେରଳର ଥିରୁଅନନ୍ତପୁରମରେ ଅବସ୍ଥିତ ପଦ୍ମନାଭସ୍ବାମୀ ମନ୍ଦିର। ଏହି ମନ୍ଦିରରେ ଉଭୟ ତାମିଲ ଓ କେରଳ ସ୍ଥାପତ୍ୟର ଝଲକ ଦେଖିବାକୁ ମିଳେ। ତାମିଲ ମନ୍ଦିର ଭଳି ଏହା ସମ୍ପୂର୍ଣ୍ଣ ରଙ୍ଗିନ ନ ହୋଇ କେରଳ ମନ୍ଦିର ପରି ଗୋଲ୍ଡେନ୍ ପ୍ଲେଟେଡ୍ ହୋଇଥାଏ। ଏଠାରେ ଭଗବାନ ବିଷ୍ଣୁ ପୂଜା ପାଆନ୍ତି। ତେବେ ଉକ୍ତ ମନ୍ଦିର ଭିତରକୁ ପ୍ରବେଶ କରିବାକୁ ହେଲେ କିଛିଟା ନିୟମ ପାଳନ କରିବାକୁ ପଡିଥାଏ। ଖାସ୍ କରି ପୁରୁଷମାନଙ୍କ ପାଇଁ ଲୁଙ୍ଗି ପିନ୍ଧିବା ବାଧ୍ୟତାମୂଳକ। ଏହାକୁ କିଣି ଅବା ଭଡାରେ ଆଣି ପିନ୍ଧିବାକୁ ପଡ଼ିଥାଏ। ଏଥିସହିତ ଶାର୍ଟ ମଧ୍ୟ ଖୋଲିବାକୁ ପଡ଼େ। ପ୍ୟାଣ୍ଟ ପିନ୍ଧିଥିଲେ ତା’ଉପରେ ଲୁଙ୍ଗି ପିନ୍ଧି ଯାଇପାରିବେ। ସେହିଭଳି ମହିଳାମାନଙ୍କୁ ଶାଢି ବା ଲଙ୍ଗ୍ ସ୍କର୍ଟ ପିନ୍ଧିବାକୁ ହେବ। କାରଣ ଏହି ପୋଷାକ ପିନ୍ଧି ନ ଥିଲେ ମନ୍ଦିର ଭିତରକୁ ପ୍ରବେଶ ମନା।
ଏହି ମନ୍ଦିରକୁ ବିନା ଶାଢିରେ ପ୍ରବେଶ ନିଷେଧ- ଉତ୍ତରପ୍ରଦେଶ,ବାରଣାସୀର କାଶୀ ବିଶ୍ୱନାଥ ମନ୍ଦିର ଏକ ପ୍ରାଚୀନ ଓ ପ୍ରସିଦ୍ଧ ଶିବ ମନ୍ଦିର। ଏହି ମନ୍ଦିର ଗଙ୍ଗା ନଦୀର ପଶ୍ଚିମ ତଟରେ ଅବସ୍ଥିତ। ୧୨ଟି ଜ୍ୟୋତିର୍ଲିଙ୍ଗ ମଧ୍ୟରୁ ଏହା ଅନ୍ୟତମ। ତେବେ ଏଠାରେ ମହାପ୍ରଭୁ ଶିବଙ୍କ ଦର୍ଶନ ପାଇଁ ଇଚ୍ଛା ରଖିଥିବା ଭକ୍ତଙ୍କୁ ପୋଷାକ ପ୍ରତି ସଜାଗ ରହିବାକୁ ହୋଇଥାଏ। କାରଣ ତାଙ୍କ ଦର୍ଶନ ନିମନ୍ତେ, ଖାସ୍ କରି ମହିଳାମାନେ ଶାଢି ପିନ୍ଧିବା ଅପରିହାର୍ୟ୍ୟ ହୋଇଥାଏ। ଆଣ୍ଠୁ ଉପରକୁ ପୋଷାକ ପିନ୍ଧି ଆସିଥିବା ମହିଳା ଭକ୍ତଙ୍କୁ ଏଠି ଶାଢି ପ୍ରଦାନ କରାଯାଏ। ଏଠାରେ ଥିବା ପୋଷାକ ବଦଳାଇବା କକ୍ଷରେ ସେମାନେ ପୋଷାକ ବଦଳାଇ ଶାଢି ପିନ୍ଧିବା ପରେ ହିଁ ମନ୍ଦିର ଭିତରକୁ ଯାଇଥାଆନ୍ତି। ମହିଳା ପୁଲିସମାନେ ଶାଢି ପିନ୍ଧିବାବେଳେ ସେମାନଙ୍କୁ ସାହାଯ୍ୟ କରିଥାଆନ୍ତି। ଉଭୟ ବିଦେଶୀ ଓ ସ୍ଥାନୀୟ ଭକ୍ତଙ୍କ ପାଇଁ ଏହି ନିୟମ ଲାଗୁ ହୋଇଥାଏ।
ଏଠାରେ ଓଦା ଶାଢିରେ କରିବେ ପୂଜା- ମହାରାଷ୍ଟ୍ର, ନାସିକ ଜିଲାର ତ୍ରିମ୍ବକ ସହରରେ ରହିଛି ତ୍ରୟମ୍ବକେଶ୍ୱର ମନ୍ଦିର। ଏହି ମନ୍ଦିର ମଧ୍ୟ ୧୨ଟି ଜ୍ୟୋତିର୍ଲିଙ୍ଗ ମଧ୍ୟରୁ ଅନ୍ୟତମ। ଏଠାରେ ମଧ୍ୟ ମହିଳାଙ୍କ ପ୍ରବେଶକୁ ନେଇ କିଛି ଅଜବ ନିୟମ ରହିଛି । ପ୍ରତିଦିନ ସକାଳ ୬ରୁ ୭ଟା ମାତ୍ର ଏକ ଘଣ୍ଟା ପାଇଁ ମହିଳାଙ୍କୁ ଏହି ମନ୍ଦିର ଭିତରକୁ ଯିବା ପାଇଁ ଅନୁମତି ଦିଆଯାଇଥାଏ। ସେଠାରେ ଭଗବାନଙ୍କ ଦର୍ଶନ କରି ତାଙ୍କୁ ପୂଜା କରିବାକୁ ହେଲେ କଟନ୍ କିମ୍ବା ସିଲ୍କର ଓଦା ଶାଢି ପିନ୍ଧିବାକୁ ପଡ଼ିଥାଏ।
ମୁଣ୍ଡକୁ ଘୋଡାଇ ରଖିବାକୁ ହେବ ଏହି ମନ୍ଦିରରେ- ଯଦି ପଞ୍ଜାବ, ଅମୃତସରରେ ଥିବା ଗୋଲ୍ଡେନ୍ ଟେମ୍ପୁଲ ବା ସ୍ବର୍ଣ୍ଣ ମନ୍ଦିର ଯିବାକୁ ଚାହୁଁଛନ୍ତି, ତେବେ ଉକ୍ତ ମନ୍ଦିରର ନିୟମାବଳୀ ସମ୍ପର୍କରେ ଜାଣିବା ମଧ୍ୟ ଜରୁରୀ। ଏହି ମନ୍ଦିର ଭିତରକୁ ଯିବାକୁ ହେଲେ ଶରୀର ସମ୍ପୂର୍ଣ୍ଣ ଘୋଉଡ଼ାଇ ହେବା ଭଳି ପୋଷାକ ପିନ୍ଧିବେ। ସବୁଠୁ ବଡ଼ କଥା ହେଲା ମୁଣ୍ଡକୁ ସ୍କାର୍ଫ, ଓଢଣୀ ବା ରୁମାଲରେ ଘୋଡାଇ ରଖିବେ। ଏହା ଉଭୟ ପୁରୁଷ ଓ ମହିଳାଙ୍କ କ୍ଷେତ୍ରରେ ଲାଗୁ। ଏଠାରେ ମନ୍ଦିର ବାହାରେ ସ୍କାର୍ଫ ମଧ୍ୟ ବ୍ରିକି ହୋଇଥାଏ।
ଏଠାରେ ଛୋଟ ବସ୍ତ୍ର ପିନ୍ଧିଥିବା ଭକ୍ତଙ୍କୁ ଦିଆଯାଏ ଶାଲ୍- ପଣଜୀ ସ୍ଥିତ ବସିଲିକା ଅଫ୍ ବମ୍ ଜେସସ୍ରେ ଛୋଟ ବସ୍ତ୍ର ପିନ୍ଧିଥିବା ଭକ୍ତଙ୍କୁ ପ୍ରବେଶ ନିଷେଧ। ଏହାର ଅର୍ଥ ନୁହେଁ ଯେ, ସେମାନେ ଭିତରକୁ ଯାଇପାରିବେ ନାହିଁ। ଏଠାରେ ଥିବା ସ୍ବେଚ୍ଛାସେବୀମାନେ ଭକ୍ତଙ୍କୁ ଶାଲ୍ ପ୍ରଦାନ କରନ୍ତି।
ଉଭୟ ପୁରୁଷ ମହିଳାଙ୍କୁ ଛୋଟବସ୍ତ୍ର ମନା- ଦିଲ୍ଲୀର ଜାମା ମସ୍ଜିଦ ପର୍ୟ୍ୟଟକଙ୍କୁ ବେଶ୍ ଆକର୍ଷିତ କରିଥାଏ। ଏଠାକୁ ବିଦେଶୀଙ୍କଠାରୁ ଆରମ୍ଭ କରି ହିନ୍ଦୁମାନେ ମଧ୍ୟ ଯାଇପାରିବେ। ହେଲେ ଛୋଟବସ୍ତ୍ର ପିନ୍ଧି ଏଠାକୁ ଆସିବା ନିଷେଧ। ଏଥିସହିତ ମୁଣ୍ଡକୁ ଏକ ରୁମାଲରେ ବାନ୍ଧିବା ମଧ୍ୟ ଆବଶ୍ୟକ ହୋଇଥାଏ।
