ନୀଳଗିରି : ନୀଳଗିରିରେ ୩୦ଦିନରେ ୪ଟି ଭାଲୁଙ୍କ ମୃତ୍ୟୁ ଘଟିଛି। ପୁଣି ମଙ୍ଗଳବାର ଦିନ ନୀଳଗିରି ବ୍ଲକ ଜାମୁଡିହା ନିକଟରେ ଥିବା ଘାଗରା ନାଳ ପାଖରେ ୨ଟି ଭାଲୁଙ୍କ ମୃତଦେହ ଉଦ୍ଧାର କରାଯାଇଛି। ତେବେ ଭାଲୁ ଦୁଇଟିର ବିଷକ୍ରିୟା ଯୋଗୁଁ ମୃତ୍ୟୁ ଘଟିଥିବା ଅନୁମାନ କରାଯାଉଛି। ତେବେ କ୍ରମାଗତ ଭାବେ ନୀଳଗିରିରେ ଭାଲୁଙ୍କ ମୃତ୍ୟୁ ହେବାରୁ ବନବିଭାଗକୁ ଚିନ୍ତାରେ ପକାଇ ଦେଇଛି। ଏ ସମ୍ପର୍କରେ ବାଲେଶ୍ୱର ଜିଲା ଡିଏଫଓ ବିଶ୍ୱରାଜ ପଣ୍ଡା କହିଛନ୍ତି ଯେ, ଏକ ଟିମ ଗଠନ କରାଯାଇ ଭାଲୁ ମୃତ୍ୟୁର ତଦନ୍ତ କରାଯିବ।
ସୂଚନାଯୋଗ୍ୟ ଯେ, ବାଲେଶ୍ୱର ଜିଲାର ନୀଳଗିରିରେ ଥିବା ତିନିକୋଶିଆ, ସ୍ୱର୍ଣ୍ଣଚୂଡ ଓ କୁଳଡିହା ଜଙ୍ଗଲରେ ଶହସ୍ରାଧିକ ଭାଲୁ ବାସ କରନ୍ତି। ଜାନୁଆରୀ ୨୮ ଓ ଫେବୃଆରୀ ୧୭ ତାରିଖରେ ଚଲଣାପାଳରେ ୨ଟି ଭାଲୁଙ୍କ ମୃତଦେହ ଉଦ୍ଧାର କରାଯାଇଥିଲା।
