ଲକ୍ଷ୍ମୀପୁର: ବେଉସା ବୁଡାଇଲା କରୋନା। ପ୍ରାୟ ୨୦ ଦିନ ହେଲା କରୋନା ମହାମାରୀ ପାଇଁ ଜନତା କର୍ଫ୍ୟୁ ଠାରୁ ଆରମ୍ଭ କରି ଲକ ଡାଉନ୍ ଜାରି ରହିଛି ସାରା ଦେଶରେ। ଏଥିପାଇଁ କେବଳ ତେଜରାତି ଦୋକାନ, ଔଷଧ ଦୋକାନ ଏବଂ ପନିପରିବା ଦୋକାନ ଖୋଲିବା ପାଇଁ ସରକାରଙ୍କ ପକ୍ଷରୁ ମଞ୍ଜୁର ମିଳିଛି। ତେବେ ଅନ୍ୟ ଛୋଟ ବ୍ୟବସାୟୀ ମାନେ ଏବେ ମୁଣ୍ଡରେ ହାତଦେଇ ବସିଛନ୍ତି। ପ୍ରତି ଦିନ ଦୋକାନ ଖୋଲି ଯାହା ଦି ପଇସା ପାଉଥିବା ଲୋକମାନେ ଏବେ ଏକପ୍ରକାର ଚିନ୍ତାରେ କାଳାତିପାତ କରୁଛନ୍ତି। ତେଲ ଲୁଣ ସଂସାର ଚଳିବ କେମିତି। କୋରାପୁଟ ଜିଲା ଲକ୍ଷ୍ମୀପୁର ବ୍ଲକରେ ଏଭଳି ଅନେକ ଛୋଟ ବ୍ୟବସାୟୀ ମାନେ ଏବେ ମୁଣ୍ଡରେ ହାତଦେଇ ବସିଛନ୍ତି।
ଏହିଭଳି ଜଣେ ବ୍ଯବସାୟୀ ହେଉଛି ପ୍ରଫୁଲ ପାତ୍ର। ସେ ଥାନା ନିକଟରେ ଏକ ଉଠା ଜଳଖିଆ ଦୋକାନ କରି ଗୁଜୁରାଣ ମେଣ୍ଟାଉଥିଲେ। ତେବେ ୨୦ ଦିନ ହେଲା ଦୋକାନ ବନ୍ଦ ଥିବା କାରଣରୁ ପରିବାର ପୋଷଣ ପାଇଁ ଚିନ୍ତାରେ ପଡ଼ିଯାଇଛନ୍ତି। ଅବଶ୍ୟ ଟଙ୍କିକିଆ ଚାଉଳ ମିଳିବା ସହିତ ହଜାର ଟଙ୍କା ମିଳିଛି। ତେବେ ତାଙ୍କର କହିବା କଥା ହେଲା ଆମେ ୩ ପ୍ରାଣୀ। ଦୋକାନରେ ଯାହା ରୋଜଗାର ହୁଏ ଆମେ ସେଥିରେ ଚଳୁ। ତିନି ସପ୍ତାହ ହେବ ଦୋକନ ବନ୍ଦ ଥିବାରୁ ଯେଉଁ ଦୋକାନୀଙ୍କ ଠାରୁ ସଉଦା ପତ୍ର ଆଣିଥିଲୁ ତାଙ୍କୁ ସରକାରଙ୍କ ପକ୍ଷରୁ ମିଳିଥିବା ହଜାରେ ଟଙ୍କା ଦେଇଦେଲି। ବର୍ତ୍ତମାନ କେମିତି ଚଳିବୁ ବୋଲି ମୁଣ୍ଡରେ ହାତ ଦେଇ ବସିଛନ୍ତି ଛୋଟ ବ୍ୟବସାୟୀ।
