ଭୁବନେଶ୍ବର: ଦେଶରେ କରୋନା ଭୂତାଣୁର ପ୍ରକୋପ ବଢ଼ିବାରେ ଲାଗିଛି। ଓଡ଼ିଶାରେ ବି ଆକ୍ରାନ୍ତଙ୍କ ସଂଖ୍ୟା ୪୮ରେ ପହଞ୍ଚିଛି। କରୋନାର ମୁକାବିଲା ପାଇଁ ରାଜ୍ୟ ସରକାର ଏପ୍ରିଲ ୩୦ ପର୍ଯ୍ୟନ୍ତ ଲକଡାଉନ ଘୋଷଣା କରିଛନ୍ତି। ଫଳରେ ଅଧିକାଂଶ ସରକାରୀ କାର୍ଯ୍ୟଠାରୁ ଆରମ୍ଭ କରି ବେସରକାରୀ କାର୍ଯ୍ୟ ଠପ୍ ହୋଇଯାଇଛି। ଲୋକଙ୍କ ଆର୍ଥିକ ସ୍ଥିତି ମଧ୍ୟ ଦୁର୍ବଳ ହୋଇପଡ଼ିଛି। ରୋଜଗାର ପନ୍ଥା ବନ୍ଦ ହୋଇଯାଇଛି। ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ଘରୋଇ ଶିକ୍ଷାନୁଷ୍ଠାନଗୁଡ଼ିକୁ ଫି ଆଦାୟ ସାମୟିକ ସ୍ଥଗିତ ରଖିବାକୁ ପରାମର୍ଶ ଦେଇଛନ୍ତି। ଶିକ୍ଷାନୁଷ୍ଠାନଗୁଡ଼ିକ ପିଲାଙ୍କ ଫି ହ୍ରାସ କରିବା ପାଇ ବିଚାରି କରିବା ସହିତ ଏପ୍ରିଲ ମାସରୁ ଜୁନ୍ ମାସ ପର୍ଯ୍ୟନ୍ତ ଫି ଆଦାୟକୁ ସ୍ଥଗିତ ରଖିବାକୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ(ସିଏମଓ) ପକ୍ଷରୁ ପରାମର୍ଶ ଦିଆଯାଇଛି। ଏପରି ପ୍ରତିକୂଳ ସମୟରେ ଯେଉଁମାନଙ୍କ ରୋଜଗାର ପନ୍ଥା କ୍ଷତିଗ୍ରସ୍ତ ହୋଇଛି ସେମାନଙ୍କୁ ଏହା ସାହାଯ୍ୟ କରିବ ବୋଲି ସିଏମଓ ପକ୍ଷରୁ କୁହାଯାଇଛି।
ଭୁବନେଶ୍ବରରେ ଏକ ଘରୋଇ ସ୍କୁଲରେ ପଢୁଥିବା ଜଣେ ଛାତ୍ରଙ୍କ ଅଭିଭାବକ କୁହନ୍ତି, ରାଜ୍ୟ ସରକାରଙ୍କ ଏହି ପରାମର୍ଶ ଅତି ଗୁରୁତ୍ଵପୂର୍ଣ୍ଣ। ଏପରି ଏକ ବିପଦ ସମୟରେ ଘରୋଇ ଶିକ୍ଷାନୁଷ୍ଠାନଗୁଡ଼ିକ ସରକାରଙ୍କ ଏହି ପରାମର୍ଶକୁ ପାଳନ କରିବା ଉଚିତ। ବର୍ତ୍ତମାନ ସବୁ କାମ ବନ୍ଦ ରହିଥିବାରୁ ରୋଜଗାର ବାଧାପ୍ରାପ୍ତ ହୋଇଛି। ତେଣୁ ଶିକ୍ଷାନୁଷ୍ଠାନଗୁଡ଼ିକ ଏ ଦିଗରେ ଚିନ୍ତା କରିବା ଦରକାର। ଫି କିଛିଟା ହ୍ରାସ କରିବା ସହିତ ୩/୪ ମାସ ସମୟ ଦେଲେ ଭଲ ହେବ ବୋଲି ସେ କହିଛନ୍ତି।
