ନୂଆଦିଲ୍ଲୀ : ୨୦୧୯ ଲୋକସଭା ନିର୍ବାଚନରେ ବିଜେପିକୁ ହରାଇବା ପାଇଁ ସବୁ ଆଞ୍ଚଳିକ ଦଳ ଏକାଠି ଲଢିବେ ଓ କିଙ୍ଗ୍ ମେକର ହେବେ ବୋଲି ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ତଥା ତେଲୁଗ ଦେଶମ ପାର୍ଟି (ଟିଡିପି) ମୁଖ୍ୟ ଚନ୍ଦ୍ରବାବୁ ନାଇଡୁ ରବିବାର କହିଛନ୍ତି। ବିଜୟୱାଡାଠାରେ ଦଳୀୟ ଏକ କାର୍ଯ୍ୟକ୍ରମରେ ଚନ୍ଦ୍ରବାବୁ କହିଥିଲେ ଯେ ୨୦୧୯ ଲୋକସଭା ନିର୍ବାଚନରେ ଆଞ୍ଚଳିକ ଦଳ କିଙ୍ଗମେକର ହେବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜ ପ୍ରତିଶ୍ରୁତି ପୂରଣରେ ବିଫଳ ହୋଇଛନ୍ତି। ତେଣୁ ବିଜେପି ଆଉ ଶାସନକୁ ଫେରିବ ନାହିଁ ବୋଲି ସେ ସୁନିଶ୍ଚିତ ଅଛନ୍ତି। ପ୍ରକାଶଯୋଗ୍ୟ ଯେ କର୍ଣ୍ଣାଟକ ମୁଖ୍ୟମନ୍ତ୍ରୀ ତଥା ଜେଡି(ଏସ୍) ନେତା ଏଚ.ଡି କୁମାରସ୍ୱାମୀଙ୍କ ଶପଥ ଗ୍ରହଣ ସମାରୋହରେ ୧୪ଟି ଦଳର ନେତା ଗୋଟିଏ ମଞ୍ଚରେ ଏକାଠି ହୋଇ ଶକ୍ତି ପ୍ରଦର୍ଶନ କରିଥିଲେ। ଠିକ୍ ଏହାପରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏହି ମନ୍ତବ୍ୟ ଦେଇଛନ୍ତି। ଏହାକୁ ୨୦୧୯ରେ ବିରୋଧୀଙ୍କ ମିଳିତ ସାମୁଖ୍ୟ ଗଠନର ସଂକେତ ବୋଲି ଦେଖାଯାଉଛି। ସବୁ ବିରୋଧୀ ଦଳ ମିଶି ବିଜେପିକୁ ହରାଇବାରେ ସକ୍ଷମ ହେବେ ବୋଲି ଚନ୍ଦ୍ରବାବୁ ଆଶା ରଖିଛନ୍ତି।
