ବିନିକା: ଗ୍ରାମାଞ୍ଚଳରେ ବସବାସ କରୁଥିବା ଗରୀବ, ଅବହେଳିତ, ନିଷ୍ପେସିତ ଏବଂ ଅସହାୟ ଲୋକଙ୍କୁ ବିନା ମୂଲ୍ୟରେ ଉପଲବ୍ଧ ହେଉଥିବା ଆଇନ ସହାୟତା ଯୋଗାଇ ଦେବା ପାଇଁ ଏବେ ଅଞ୍ଚଳର ଗାଁରୁ ଗାଁକୁ ଯାଇ ବିନିକା ତାଳୁକ ଆଇନ ସେବା ସହାୟତା କମିଟି ପକ୍ଷରୁ ସଚେତନ କରାଯାଉଛି। ଏହି ପରିପ୍ରେକ୍ଷୀରେ ତାଲୁକ ଆଇନ ସେବା ଅଧ୍ୟକ୍ଷ ତଥା ବିନିକା କୋର୍ଟର ବିଚାରପତି ଜଗଦୀଶ ଚନ୍ଦ୍ର ଜେନା ଅଞ୍ଚଳର ଗାଁରୁ ଗାଁକୁ ଯାଇ ଏ ସମ୍ପର୍କରେ ବିଚାର ବିଭାଗ ପକ୍ଷରୁ ଏସବୁ ବର୍ଗର ଲୋକଙ୍କ ପାଇଁ ଉଦ୍ଧିଷ୍ଟ ବା ଉପଲବ୍ଧ ହେଉଥିବା ସମସ୍ତ ପ୍ରକାର ଆଇନ ସେବା ସହାୟତା ଯୋଗାଇ ଦେବା ନେଇ ଲୋକଙ୍କୁ ବୁଝାଇବା ସହ ଏନେଇ ସଚେତନ କରିଥିଲେ।
ଏଥିପାଇଁ ବିନିକା ତାଲୁକ ଆଇନ ସେବା ସହାୟତା କମିଟି ପକ୍ଷରୁ ଗତକାଲି ଅଞ୍ଚଳର ୨୦ଟି ଗ୍ରାମକୁ ଗସ୍ତକରି ସେଠାରେ ଲୋକଙ୍କୁ ଆଇନ ସେବା ସମ୍ପର୍କରେ ବୁଝାଇଥିବା ବେଳେ ଆଜି ମଧ୍ୟ ଅଞ୍ଚଳର ୩୦ ଗୋଟି ଗାଁକୁ ଯାଇ ସେଠାରେ ଅସହାୟ ଓ ଦୁର୍ବଳ ଆର୍ଥିକ ଅବସ୍ଥାରେ ଜୀବନଯାପନ କରିଥିବା ଲୋକଙ୍କ ପାଇଁ ଉଦ୍ଧିଷ୍ଟ ଥିବା ଆଇନ ସେବା ସହାୟତା ପ୍ରଦାନ ସମ୍ପର୍କରେ ସଚେତନ କରାଇଥିଲେ। ଏଥିରେ ବିନିକା କୋର୍ଟର କିରାଣୀ ଉମାଶଙ୍କର ସାହୁଙ୍କ ସମେତ ସବ୍ୟସାଚୀ ମିଶ୍ର ଓ କର୍ମଚାରୀ ଅଭିଷେକ ବାଗ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମରେ ସକ୍ରିୟ ସହଯୋଗ କରିଥିବା ବେଳେ ବିନିକା ଓକିଲ ସଂଘ ପକ୍ଷରୁ ଆଇନଜୀବୀମାନେ ଏହି ସଚେତନ କାର୍ଯ୍ୟକ୍ରମରେ ସାମିଲ ଥିଲେ।
