ବୌଦ୍ଧ: ବୌଦ୍ଧ ଜିଲାପରିଷଦ ଅଧକ୍ଷ୍ୟ ନିର୍ବାଚନରେ ଶାସକ ବିଜେଡି ଦଳ ପୁଣି ପଞ୍ଚମ ଥର ପାଇ ଜିଲାପରିଷଦ ଆସନ ଅକ୍ତିଆର କରିଛି। ରବିବାର ଦିନ ଅଧକ୍ଷ୍ୟ ନିର୍ବାଚନରେ ୯ ନମ୍ବର ଜୋନର ଜିଲାପରିଷଦ ସଭ୍ୟା ପ୍ରଭାସିନୀ ଦାସ ନିର୍ଦ୍ବନ୍ଦ୍ବରେ ଅଧ୍ୟକ୍ଷା ଭାବରେ ନିର୍ବାଚିତ ହୋଇଛନ୍ତି। ବୌଦ୍ଧ ଜିଲାରେ ସମୁଦାୟ ୯ ଗୋଟି ଜିଲାପରିଷଦ ଜୋନ ମଧ୍ୟରୁ ଶାସକ ବିଜେଡି ୭ ଗୋଟି ଆସନ ପାଇଥିବାବେଳେ ଜିଲାରେ ପ୍ରମୁଖ ବିରୋଧି ବିଜେପି ୨ ଗୋଟି ଆସନ ପାଇଥିଲା। ବୌଦ୍ଧ ଜିଲା ଗଠନ ହେବାପରେ ପ୍ରଥମ ଜିଲାପରିଷଦ ଜନତା ଦଳ ଟିକେଟରୁ ବିଜୟୀ ହୋଇ ଶେଖ ସଲିମ ଜିଲାପରିଷଦ ଅଧକ୍ଷ୍ୟ ହୋଇଥିଲେ। ତା’ ପରୁଠାରୁ ଆଜି ପର୍ଯ୍ୟନ୍ତ ଶାସକ ବିଜେଡି ଲଗାତାର ୫ ଥର ହେଲା ଜିଲାପରିଷଦ ଅଧକ୍ଷ୍ୟ ଆସନ ଅକ୍ତିଆରେ କରିବାରେ ସଫଳ ହୋଇଛି।
ଜିଲାରେ ଥିବା ପ୍ରମୁଖ ବିରୋଧି କଂଗ୍ରେସ ଓ ବିଜେପି ଆଜି ପର୍ଯ୍ୟନ୍ତ ଜିଲାପରିଷଦ ଅଧକ୍ଷ୍ୟ ଆସନ ହାତେଇବାରେ ସଫଳ ହୋଇପାରିନାହିଁ। ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବୌଦ୍ଧ ଜିଲା ପରିଷଦ ଅଧକ୍ଷ୍ୟ ପଦବୀ ଅନୁସୁଚିତ ଜାତି ମହିଳାଙ୍କ ପାଇଁ ସଂରକ୍ଷିତ ରହିଥିଲା। ବିଜେଡିରୁ ୨ ଜଣ ଅନୁସୂଚିତ ବର୍ଗର ମହିଳା ୫ ନମ୍ବର ଜୋନରୁ ଉର୍ମିଳା ଝାଙ୍କର ଓ ୯ ନମ୍ବର ଜୋନରୁ ପ୍ରଭାସିନୀ ଦାସ ବିଜୟୀ ହୋଇଥିଲେ। ଜିଲାପରିଷଦର ଅଧ୍ୟକ୍ଷା ଭାବରେ ନିର୍ବାଚିତ ହୋଇଥିବା ପ୍ରଭାସିନୀ ଉଚ୍ଚ ଶିକ୍ଷିତା ହୋଇଥିବାରୁ ତାହାଙ୍କୁ ଦଳ ପକ୍ଷରୁ ଏହି ସୁଯୋଗ ଦିଆଯାଇଥିବା ଆଲୋଚନା ହେଉଛି।
