ବଡ଼ସାହି : ଶିମିଳିପାଳ ସଂଲଗ୍ନ ବଡ଼ସାହି ବ୍ଲକର କାଦୁଆଲବନ୍ଧ ଗ୍ରାମକୁ ତୀରବିଦ୍ଧ ଅବସ୍ଥାରେ ଜାତୀୟ ଉଦ୍ୟାନ ଶିମିଳିପାଳ ଅଭୟାରଣ୍ୟରୁ ପଳାଇ ଆସିଥିବା ଏକ ସମ୍ବରର ଚିକତ୍ସା ପୂର୍ବରୁ ମୃତ୍ୟୁ ଘଟିଛି। ସୋମବାର ସକାଳେ ଗ୍ରାମବାସୀ ଏହି ତୀରବିଦ୍ଧ ସମ୍ବରଟିକୁ ଦେଖି ଧରିବା ପାଇଁ ଚେଷ୍ଟା କରିଥିଲେ। ଖବର ପାଇ ବନବିଭାଗ ପହଞ୍ଚି ଗ୍ରାମବାସୀଙ୍କ ସହାୟତରେ ସମ୍ବରକୁ ଧରି ଡୁକୁରା ରେଞ୍ଜ କାର୍ଯ୍ୟାଳୟକୁ ଆଣିବା ବାଟରେ ମୃତ୍ୟୁ ଘଟିଥିଲା।
ଡୁକୁରା ରେଞ୍ଜର ଲକ୍ଷ୍ମୀଧର ବେହେରାଙ୍କ କହିବାନୁଯାୟୀ, ସମ୍ବରଟି ୬ବର୍ଷ ବୟସ ହୋଇଥିବା ବେଳେ ୯୦ରୁ ୯୫କେଜି ଓଜନର ବୋଲି ପ୍ରାଣୀଧନ ନୀରିକ୍ଷକ ପ୍ରକାଶ କରିଛନ୍ତି। ତୀରବିଦ୍ଧ ସମ୍ବର ସହିତ ଅନ୍ୟ ଏକ ସମ୍ବର ବୁଲୁଥିବାର ଗ୍ରାମର ମୀନକେତନ ମହାନ୍ତ, ଲୋକନାଥ ମହାନ୍ତ ଓ ଗୌତମ ସାହୁ ପ୍ରମୁଖ ଦେଖିଥିବାର ପ୍ରକାଶ କରିଛନ୍ତି। ଦୁଇଟି ସମ୍ବରର ପାଦଚିହ୍ନ ପଡିଥିବା ବେଳେ ଅନ୍ୟ ସମ୍ବରଟିର ରିପୋର୍ଟ ଲେଖା ଯିବା ବେଳକୁ ବନବିଭାଗ ଠାବ କରିପାରି ନାହିଁ। ଶିମିଳିପାଳରେ ଅବାଧ ଶିକାର ପାଇଁ ନିରୀହ ଜୀବଜନ୍ତୁ ବଳି ପଡୁଥିବା ବେଳେ ଶିକାର ପରେ ସେମାନଙ୍କ ଅଙ୍ଗପ୍ରତ୍ୟଙ୍ଗ ଜିନିଷ ଚାଲାଣ ଘଟଣା ଜିଲାରେ ବାରମ୍ବାର ଦେଖିବାକୁ ମିଳୁଛି।
