ମଧ୍ୟରାତ୍ରିରେ ସିଆରପିଏଫ କ୍ୟାମ୍ପ ଉପରେ କୁକୀ ଆତଙ୍କବାଦୀଙ୍କ ଆକ୍ରମଣ, ୨ ଯବାନ ଶହୀଦ

ଇମ୍ଫାଲ: ମଣିପୁରର ବିଷ୍ଣୁପୁର ଜିଲା ଅନ୍ତର୍ଗତ ନାରନସେନା ଅଞ୍ଚଳରେ ଥିବା କେନ୍ଦ୍ରୀୟ ସଂରକ୍ଷିତ ପୁଲିସ ବାହିନୀ (ସିଆରପିଏଫ)ର ଏକ କ୍ୟାମ୍ପ ଉପରେ ଆକ୍ରମଣ ହୋଇଛି। କୁକୀ ଆତଙ୍କବାଦୀଙ୍କ ପକ୍ଷରୁ ହୋଇଥିବା ଏହି ଆକ୍ରମଣରେ ୨ ଜଣ ସିଆରପିଏଫ ଯବାନ ସହିଦ ହୋଇଛନ୍ତି।

ସୂଚନା ଅନୁସାରେ, ସିଆରପିଏଫ ୧୨୮ ବାଟାଲିୟନର ଯବାନମାନେ ନାରନସେନା ଅଞ୍ଚଳରେ ମୁତୟନ ହୋଇଥିଲେ। ଶୁକ୍ରବାର ବିଳମ୍ବିତ ରାତି ପ୍ରାୟ ୨ଟା ୧୫ ମିନିଟରେ ଯବାନମାନେ ଶୋଇଥିବାବେଳେ କୁକୀ ଆତଙ୍କବାଦୀଙ୍କ ପକ୍ଷରୁ ଅତର୍କିତ ଆକ୍ରମଣ କରାଯାଇଥିଲା। ଯବାନମାନେ ଆକ୍ରମଣ ସମ୍ପର୍କରେ ଜାଣିପାରି ପ୍ରତିଆକ୍ରମଣ କରିଥିଲେ। ଫଳରେ ଆତଙ୍କବାଦୀ ଏବଂ ଯବାନଙ୍କ ମଧ୍ୟରେ ଗୁଳିବିନିମୟ ହୋଇଥିଲା। ଏଥିରେ ୨ ଯବାନ ପ୍ରାଣ ହରାଇଥିଲେ।