ଆରଡି : ରାଜ୍ୟର ପ୍ରସିଦ୍ଧ ଶୈବପୀଠ ଆରଡିଧାମ ବାବା ଆଖଣ୍ଡଳମଣିଙ୍କ ମନ୍ଦିର ବେଢା ପ୍ରାଙ୍ଗଣରେ ଥିବା ପୀଠଦେବୀ ଜୟଦୁର୍ଗାଙ୍କର ବାସନ୍ତୀ ଦୁର୍ଗାପୂଜା ଅନୁଷ୍ଠିତ ହେଉଛି। ଏହି ଅବସରରେ ଗତ ଗୁରୁବାର ଘଟସ୍ଥାପନ କରାଯିବା ସହ ମାଆଙ୍କ ପୂଜା ମଣ୍ଡପରେ ସପ୍ତମୀ ପୂଜାର୍ଚ୍ଚନା କରାଯିବା ସହିତ ଶୁକ୍ରବାର ମହାଷ୍ଟମୀ ପୂଜା ଅନୁଷ୍ଠିତ ହୋଇଥିଲା। ସେହିପରି ଶନିବାର ମହାନବମୀ ପୂଜାର୍ଚ୍ଚନା ନିମନ୍ତେ ଭୋର ପହଡ ଖୋଲିବା ପରେ ମାଆଙ୍କ ନିକଟରେ ମଙ୍ଗଳଆଳତୀ ସହ ହଳଦୀ ପଞ୍ଚାମୃତ ସ୍ନାନ, ଚଣ୍ଡିପାଠ, ଦ୍ୱାରପାଳପୂଜା, ଅପରାଜିତା ପୂଜା ଆଦି ଅନୁଷ୍ଠିତ ହୋଇଥିଲା। ସନ୍ଧ୍ୟାରେ ଷୋଡଶ ପୂଜାର୍ଚ୍ଚନା କରାଯିବା ସହିତ ରାତ୍ର ନିଶାର୍ଦ୍ଧରେ ମାଆଙ୍କୁ ଘୃତ ଆହୁତୀ ପ୍ରଦାନ କରାଯିବ ବୋଲି ସେବାକାରିମାନେ ପ୍ରକାଶ କରିଛନ୍ତି। ଆସନ୍ତା ରବିବାର ଦଶହରା ନୀତକାନ୍ତି ଅନୁଷ୍ଠିତ ହେବା ସହିତ ଘଟ ବିସର୍ଜନ କରାଯିବ ବୋଲି ପୂଜକମାନେ ପ୍ରକାଶ କରିଛନ୍ତି। ଏହି ପୂଜାରେ ପ୍ରତିଦିନ ମାଆଙ୍କୁ ଫୁଲ ଚନ୍ଦନ ଓ ବିଭିନ୍ନ ଅଳଙ୍କାରରେ ଆଭୁଷଣ କରାଯାଇ ବିଭିନ୍ନ ବେଶରେ ସଜ୍ଜିତ କରାଯାଇଥାଏ।
Comments are closed.