କେନ୍ଦୁଝରଗଡ଼: କେନ୍ଦୁଝର ଜିଲା ଆଇନ ସେବା ପ୍ରାଧିକରଣ ଓ ଜିଲା ପ୍ରଶାସନ ଭିନ୍ନକ୍ଷମ ସଶକ୍ତିକରଣ ମିଳିତ ସହଯୋଗରେ ପରିବାର ପରାମର୍ଶ କେନ୍ଦ୍ର ସଭାଗୃହରେ ଗୁରୁବାର ପୂର୍ବାହ୍ନରେ କିନ୍ନରମାନଙ୍କ ଅଧିକାର ଓ ଆଇନଗତ ଦିଗ ସମ୍ପର୍କିିତ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ପ୍ରାଧିକରଣ ଅଧ୍ୟକ୍ଷ ତଥା ଜିଲା ଓ ଦୌରାଜଜ୍ ଅଶୋକ କୁମାର ପଣ୍ଡାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଆୟୋଜିତ ଏହି କାର୍ଯ୍ୟକ୍ରମରେ ପ୍ରାଧିକରଣ ସଚିବ ମାମୀ ବେହେରା ମୁଖ୍ୟଅତିଥି ଭାବେ ଯୋଗଦେଇ ସରକାରଙ୍କ ବିଭିନ୍ନ ଯୋଜନାର ସୁଫଳକୁ ଆପଣାଇ କିନ୍ନରମାନେ ମର୍ଯ୍ୟାଦାର ସହିତ ଜିଇଁବା ସହ ସ୍ୱାବଲମ୍ବୀଶୀଳ ହେବାକୁ ଆହ୍ୱାନ ଦେଇଥିଲେ। କିନ୍ନରମାନଙ୍କୁ ସେମାନଙ୍କ ନ୍ୟାର୍ଯ୍ୟ ଦାବି ହାସଲ ନିମନ୍ତେ ଜିଲା ଆଇନ ସେବା ପ୍ରାଧିକରଣ ସର୍ବଦା ତତ୍ପର ଅଛି ବୋଲି ମୁଖ୍ୟଅତିଥି ସଚିବ ଶ୍ରୀମତୀ ବେହେରା କହିଥିଲେ। ଜିଲା ସାମାଜିକ ସୁରକ୍ଷା ଅଧିକାରୀ ବିପ୍ଳବ କେଶରୀ ସାମନ୍ତରାୟ ଯୋଗଦେଇ କିନ୍ନରମାନଙ୍କ ନିମନ୍ତେ ଉଦ୍ଦିଷ୍ଟ ‘ସ୍ୱୀକୃତି’ ଓ ଅନ୍ୟାନ୍ୟ ଯୋଜନା ଗୁଡିକର କିଭଳି ସଫଳ କାର୍ଯ୍ୟାନ୍ୱୟନ ହୋଇ କିନ୍ନର ମାବେ ଏହାର ସୁଫଳ ପାଇପାରିବେ ସେ ଦିଗରେ ପ୍ରଶାସନ ସର୍ବଦା ସହଯୋଗର ହାତ ବଢ଼଼ାଇ ଆସିଛି ବୋଲି କହିଥିଲେ। ପ୍ରାରମ୍ଭରେ ପ୍ରାଧିକରଣ ସଦସ୍ୟ ତଥା ତଦାଶା ସମ୍ପାଦକ ଅୟକ୍ଷ କୁମାର ଚକ୍ର ସ୍ୱାଗତଭାଷଣ ଓ ଅତିଥି ପରିଚୟ ପ୍ରଦାନ ଅବସରରେ କିନ୍ନର ମାନେ କିଭଳି ପ୍ରାଧିକରଣ ଓ ପରିବାର ପରାମର୍ଶ କେନ୍ଦ୍ର ମାଧ୍ୟମରେ ସହାୟତା ପାଇ ପାରୁଛନ୍ତି ସେ ସମ୍ପର୍କରେ ବିସ୍ତୃତ ଭାବେ ଆଲୋକପାତ କରିଥିଲେ। ଅନ୍ୟମାନଙ୍କ ମଧ୍ୟରେ ସଦର ବ୍ଲକ ଶିଶୁ ବିକାଶ ପ୍ରକଳ୍ପ ଅଧିକାରୀ ସ୍ୱର୍ଣ୍ଣଲତା ବେହେରା ଓ ସାମ୍ବାଦିକ ସତ୍ୟଜିତ ମିଶ୍ର ଅତିଥି ଭାବେ ଯୋଗଦେଇ କିନ୍ନରମାନେ ସମାଜର ମୁଖ୍ୟସ୍ରୋତରେ ସାମିଲ ହେବାକୁ ସମସ୍ତବର୍ଗର ଲୋକେ ସହଯୋଗର ହାତ ବଢ଼ାଇବାକୁ ନିବେଦନ କରିଥିଲେ। ଜିଲାର ବିଭିନ୍ନ ସ୍ଥାନରୁ ୪୩ଜଣ କିନ୍ନର ଯୋଗଦେଇ ଦୈନନ୍ଦିନ ଜୀବନରେ ବିଭିନ୍ନ ସମସ୍ୟାର ସମ୍ମୁଖୀନ ହୋଇ ଆସୁଥିବା ବେଳେ ଏହାର କିଭଳି ସ୍ଥାୟୀ ସମାଧାନ କରାଯାଇ ସେମାନଙ୍କୁ ସ୍ୱାଧୀନ ଭାବେ ବଞ୍ଚି ରହିବା ଦିଗରେ ଉଭୟ ପ୍ରାଧିକରଣ ଓ ଜିଲା ପ୍ରଶାସନ ସହଯୋଗ କରିବାକୁ ଅନୁରୋଧ କରିଥିଲେ।
Comments are closed.