ଡେସ୍କ: ରାଜ୍ୟର ବାଣିଜ୍ୟ ନଗରୀ କୁହାଯାଉଥିବା କଟକ ସହରରେ ଗତକାଲି ଠାରୁ ସମସ୍ତ ବ୍ୟାଙ୍କର ଏଟିଏମ ଅଚଳ ରହିଛି। ସହର ମଧ୍ୟରେ ଥିବା ଏଟିଏମ ଗୁଡିକ ମଧ୍ୟରୁ ଅଧାରୁ ଅଧିକରେ ସଟର ପଡିଥିବା ବେଳେ ଖୋଲାଥିବା ଏଟିଏମ ଗୁଡିକରେ ‘ATM is out of service’ କିମ୍ବା ‘This ATM cannot dispense cash’ ଲେଖା ପ୍ରଦର୍ଶିତ ହେଉଛି। ଏଭଳି ଅଚଳ ଅବସ୍ଥା ଗତକାଲି ଠାରୁ ଲାଗି ରହିଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପଦକ୍ଷେପ ନିଆଯାଇନାହିଁ। ଲୋକମାନେ ପଇସା ଉଠାଇବା ପାଇଁ ଏଟିଏମରୁ ଏଟିଏମ ଯାଉଛନ୍ତି ହେଲେ ଅର୍ଥ ଉଠାଣ କରିବା ସମ୍ଭବ ହେଉନାହିଁ।
ସହର ମଧ୍ୟରେ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର ସର୍ବାଧିକ ଏଟିଏମ ରହିଛି। ତେବେ ୧୨ ଘଣ୍ଟାରୁ ଅଧିକ ସମୟ ଧରି ଏଭଳି ଅଚଳାବସ୍ଥା ଲାଗି ରହିଥିବା ବେଳେ ଏହାକୁ ସଚଳ କରିବାକୁ କୌଣସି ପଦକ୍ଷେପ ନିଆଯାଇ ନାହିଁ।
