ଗୋପାଳପୁର: ବ୍ରହ୍ମପୁର-ଗଞ୍ଜାମ ଜିଲ୍ଲାର ପ୍ରମୁଖ ପର୍ଯ୍ୟଟନ କ୍ଷେତ୍ର ମାନ୍ୟତା ପାଇଥିବା ଗୋପାଳପୁରଠାରେ ଉଦଘାଟିତ ହୋଇଛି ଅଲ୍ ଓଡିଶା ସିନିୟର ଷ୍ଟେଟ ରାଙ୍କିଙ୍ଗ୍ ବ୍ୟାଡମିଣ୍ଟନ ଟୁର୍ଣ୍ଣାମେଣ୍ଟ। ସ୍ଥାନୀୟ ବିଜୁ ପଟ୍ଟନାୟକ ବହୁମୁଖୀ ଇନଡୋର ଷ୍ଟାଡିୟମ୍ ପରିସରରେ ଆୟୋଜିତ ଏହି ଟୁର୍ଣ୍ଣାମେଣ୍ଚକୁ ମୁଖ୍ୟଅତିଥି ରୂପେ ଗଞ୍ଜାମ ଜିଲ୍ଲା କ୍ରୀଡା ସଂଘ ସଂପାଦକ ଜେ.କାମେଶ୍ୱର ରାଓ ଯୋଗଦେଇ ଉଦଘାଟନ କରିଥିଲେ। ରାଜ୍ୟରେ ବିଭିନ୍ନ କ୍ରୀଡା ପାଇଁ ଭିତ୍ତିଭୂମିର ବିକାଶ ନିମନ୍ତେ ରାଜ୍ୟ ସରକାରଙ୍କ ପକ୍ଷରୁ ଅନେକ ଉଦ୍ୟମ କରାଯାଇଥିବାବେଳେ ଅଧିକରୁ ଅଧିକ ନୂତନ କ୍ରୀଡାବିତ୍ ସୃଷ୍ଟି କରିବାକୁ ସମସ୍ତେ ଗୁରୁତ୍ୱ ଦେବା ପାଇଁ ମୁଖ୍ୟଅତିଥି ଆହ୍ୱାନ କରିଥିଲେ।
ଓଡିଶା ରାଜ୍ୟ ବ୍ୟାଡମିଣ୍ଟନ ଆସୋସିଏନ୍ ପକ୍ଷରୁ ଆୟୋଜିତ ଏବଂ ଗଞ୍ଜାମ ଜିଲ୍ଲା ଶାଖା ପକ୍ଷରୁ ପରିଚାଳିତ ଏହି ପ୍ରତିଯୋଗିତାରେ ଅନ୍ୟତମ ଅତିଥି ରୂପେ ବରିଷ୍ଠ ସାମ୍ୱାଦିକ ସମୀର କୁମାର ଆଚାର୍ଯ୍ୟ ଯୋଗଦେଇଥିଲେ। ସଂଙ୍ଗଠନ ସମ୍ପାଦକ ମିତେନ୍ଦ୍ର ଭୂୟାଁଙ୍କ ସଂଯୋଜନାରେ ଆୟୋଜିତ ଉଦଘାଟନୀ କାର୍ଯ୍ୟକ୍ରମରେ ଅତିଥି ରୂପେ ବ୍ୟାଡମିଣ୍ଟନ ଆସୋସିଏନ୍ ଜୋନାଲ ସମ୍ପାଦକ ଦୀପକ ରଞ୍ଜନ ମହାନ୍ତି, ମାଲକାନଗିରି ଜିଲ୍ଲା ସଙ୍ଘ ସମ୍ପାଦକ ପିତାପଲ ସିଂ, ମୁଖ୍ୟ ରେଫେରି ମନୋଜ କୁମାର ସାବତ ପ୍ରମୁଖ ମଞ୍ଚାସୀନ ଥିଲେ। ରାଜ୍ୟରେ ପ୍ରତ୍ୟେକ ବର୍ଷ ଅଲ୍ ଓଡିଶା ବ୍ୟାଡମିଣ୍ଟନ ଆସୋସିସନ୍ ପକ୍ଷରୁ ଏହି ଟୁର୍ଣ୍ଣାମେଣ୍ଟ ତିନି ଥର ଆୟୋଜନ କରାଯାଉଥିବା ବେଳେ ଏହାରି ମାଧ୍ୟମରେ କ୍ରୀଡାବିତଙ୍କ ରାଙ୍କିଙ୍ଗ୍ କରାଯାଇଥାଏ। ଏଥିରୁ ଚୟନ ହେଉଥିବା କ୍ରୀଡାବିତମାନେ ଜୋନାଲ ଏବଂ ଜାତୀୟ ସ୍ତରୀୟ କ୍ରୀଡା ପ୍ରତିଯୋଗିତାରେ ଭାଗ ନେଇଥାଆନ୍ତି। ଟୁର୍ଣ୍ଣାମେଣ୍ଟରେ ୧୮ଟି ଜିଲ୍ଲାରୁ ଉଭୟ ସିନିୟର ବାଳକ ଓ ବାଳିକା ବିଭାଗର ୧୦୭ କ୍ରୀଡାବିତ୍ ଭାଗ ନେଇଛନ୍ତି। ମୋଟ ୫ଟି ବର୍ଗରେ ଟୁର୍ଣ୍ଣାମେଣ୍ଟ ହେବ। ଆସନ୍ତା ୧୫ ତାରିଖରେ ଏହା ଉଦଯାପିତ ହେବ।
