ବଳଦକୁ ଧକ୍କା ଦେଲା ସ୍କୁଟି ; ଶିକ୍ଷୟିତ୍ରୀ ପତ୍ନୀ ମୃତ, ସ୍ବାମୀ ଗୁରୁତର

ପାଟଣା : ତୁରୁମୁଙ୍ଗା ଥାନା ଅଞ୍ଚଳ ସାହାରପଡା ବ୍ଲକ ଅନ୍ତର୍ଗତ ବିଲା ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ହୋଇଛି। ସୂଚନା ଅନୁସାରେ ସଡକ ପାର ହେଉଥିବା ଏକ ବଳଦ ସହ ଘରକୁ ଫେରୁଥିବା ଶିକ୍ଷକ ଦମ୍ପତିଙ୍କ ସ୍କୁଟି ଧକ୍କା ଦେବାରୁ ଶିକ୍ଷୟିତ୍ରୀ ଥିବା ପତ୍ନୀ ଶ୍ରୀମତୀ ଯଜାତୀ ମହାନ୍ତ (୫୩)ଙ୍କର ମୃତ୍ୟୁ ଘଟିଥିବା ବେଳେ ସ୍ବାମୀ ଅବସରପ୍ରାପ୍ତ ଶିକ୍ଷକ ରତ୍ନାକର ମହାନ୍ତ (୬୦) ଗୁରୁତର ହୋଇଛନ୍ତି। ଗୁରୁତର ଅବସ୍ଥାରେ ରତ୍ନାକରଙ୍କୁ କରଞ୍ଜିଆ ମେଡିକାଲରେ ଚିକିତ୍ସା ପାଇଁ ଭର୍ତ୍ତି ହୋଇଛନ୍ତି ।
ଉଭୟ ଶିକ୍ଷକ ଦମ୍ପତି ସ୍କୁଟି ଯୋଗେ ନିଜ ଗ୍ରାମ ଖଜିରାପାଟ ପଞ୍ଚାୟତ ରାମପୁର ଗ୍ରାମକୁ ଫେରୁଥିବା ସମୟରେ ବିଲା ଛକ ନିକଟରେ ତାଙ୍କର ଏକ ବଳଦ ସହ ଧକ୍କା ହୋଇଥିଲା । ମୃତ ଶିକ୍ଷୟିତ୍ରୀ ସାହାରପଡା ବ୍ଲକ ଗୁଣ୍ଡୁରିପଶି ପ୍ରାଥମିକ ବିଦ୍ୟାଳୟରେ ଶିକ୍ଷୟିତ୍ରୀ ଥିଲେ । ଘଟଣାସ୍ଥଳରୁ ଉଦ୍ଧାର କରି କରଞ୍ଜିଆ ଉପଖଣ୍ଡ ଡାକ୍ତରଖାନା ନେବା ବାଟରେ ତାଙ୍କର ମୃତ୍ୟୁ ଘଟିଛି । ବିଦ୍ୟାଳୟରୁ ପତ୍ନୀକୁ ନେଇ ଘରକୁ ଫେରୁଥିବା ସମୟରେ ଏହି ଦୁର୍ଘଟଣା ଘଟିଥିବା ବେଳେ ତୁରୁମୁଙ୍ଗା ପୋଲିସ ଘଟଣାର ତଦନ୍ତ କରୁଛି ।