ପ୍ରୟାଗରାଜ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ସୋମବାର ମହାକୁମ୍ଭ ମେଳାର ତ୍ରିବେଣୀ ସଙ୍ଗମରେ ବୁଡ଼ ପକାଇଛନ୍ତି। ତ୍ରିବେଣୀ ସଙ୍ଗମରେ ବୁଡ ପକାଇବା ପରେ ବୈଦିକ ମନ୍ତ୍ର ପାଠ ମଧ୍ୟରେ ରାଷ୍ଟ୍ରପତି ପୂଜାର୍ଚ୍ଚନା ଓ ଆଳତି କରିଥିଲେ। ପରେ ସେ ଅକ୍ଷୟବଟ ଓ ସରସ୍ବତୀ କୂଅକୁ ଦର୍ଶନ କରିଥିଲେ। ସନାତନ ସଂସ୍କୃତିରେ ଅକ୍ଷୟବଟକୁ ଅମରତ୍ବର ପ୍ରତିକ ଭାବେ ଗ୍ରହଣ କରାଯାଇଥାଏ। ଏହା ହିନ୍ଦୁଧର୍ମର ଏକ ମହତ୍ତ୍ବପୂର୍ଣ୍ଣ ସ୍ଥାନ।
ଏହାପରେ ବଡ ହନୁମାନ ମନ୍ଦିରରେ ପୂଜାର୍ଚ୍ଚନା କରିଥିଲେ। ମନ୍ଦିରର ମହନ୍ତ ତଥା ବାଘମ୍ବର ପୀଠର ପୀଠାଧିଶ୍ବର ବଲବୀର ଗିରି ରାଷ୍ଟ୍ରପତିଙ୍କୁ ପୂଜାର୍ଚ୍ଚନାରେ ସହଯୋଗ କରିଥିଲେ। ରାଷ୍ଟ୍ରପତିଙ୍କ ସହିତ ରାଜ୍ୟପାଳ ଆନନ୍ଦିବେନ ପଟେଲ ଓ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉପସ୍ଥିତ ରହିଥିଲେ। ମୁଖ୍ୟମନ୍ତ୍ରୀ ଆଦିତ୍ୟନାଥ ରାଷ୍ଟ୍ରପତିଙ୍କୁ ବିମାନବନ୍ଦରରେ ସ୍ବାଗତ କରିଥିଲେ।
ମହାକୁମ୍ଭରେ ବୁଡ ପକାଇବା ପରେ ରାଷ୍ଟ୍ରପତି ସୋସିଆଲ ମିଡିଆ ଏକ୍ସର ପୋଷ୍ଟରେ ଲେଖିଛନ୍ତି ‘ପ୍ରୟାଗରାଜ ମହାକୁମ୍ଭର ଔଲକିକ ମା’ ଗଙ୍ଗା, ସରସ୍ବତୀ ଓ ଯମୁନାଙ୍କ ସଙ୍ଗମରେ ସ୍ନାନ କରିବାର ସୌଭାଗ୍ୟ ପ୍ରାପ୍ତ ହୋଇଛି। ଶ୍ରଦ୍ଧା ଓ ବିଶ୍ବାସର ଏହି ବିଶାଳ ସମାଗମ ଭାରତର ସମୃଦ୍ଧ ସାଂସ୍କୃତିକ ଓ ବିଶ୍ବାସର ଜୀବନ୍ତ ପ୍ରତୀକ। ମହାକୁମ୍ଭ ମାନବତା ଏକତା ଏବଂ ଆଧ୍ୟାତ୍ମିକତାର ବାର୍ତ୍ତା ଦେଉଛି। ମା ଗଙ୍ଗାଙ୍କୁ ମୋର ପ୍ରାର୍ଥନା ସେ ସମସ୍ତଙ୍କ ଉପରେ ତାଙ୍କର କୃପା ବୃଷ୍ଟି କରନ୍ତୁ। ସମସ୍ତଙ୍କ ଜୀବନରେ ସୁଖ ଓ ଶାନ୍ତି ବିରାଜମାନ କରୁ।’
