ସମାଜ ଡିଜିଟାଲ ଡେସ୍କ: କ୍ରୀଡ଼ା କ୍ଷେତ୍ରରେ ଆଦିବାସୀ ସମ୍ପ୍ରଦାୟ ଆଣିବେ ଗୌରବ। ରାଜ୍ୟ ଓ ଜାତୀୟସ୍ତରରେ ଓଡ଼ିଶା ପାଇଁ ସୁନାମ ମଧ୍ୟ ଆଣିବେ। ଚଳିତବର୍ଷ ବନବାସୀ କଲ୍ୟାଣ ଆସୋସିଏସନ ପକ୍ଷରୁ କଟକରେ ଦୁଇ ଦିନ ଧରି ଅନୁଷ୍ଠିତ ହେବାକୁ ଯାଉଛି ପ୍ରାଦେଶିକ ୨୭ତମ ଜନଜାତି କ୍ରୀଡ଼ା ପ୍ରତିଯୋଗିତା। ଏହା ଆସନ୍ତା ନଭେମ୍ବର ୩୦ ଓ ଡିସେମ୍ବର ୧ ଦୁଇଦିନ ବ୍ୟାପୀ ସ୍ଥାନୀୟ ସତ୍ୟବ୍ରତ ଷ୍ଟାଡିୟମଠାରେ ଅନୁଷ୍ଠିତ ହେବାକୁ ଯାଉଛି। ଏହି ପ୍ରତିଯୋଗିତା ପାଇଁ ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି। ପ୍ରତିଯୋଗିତାରେ ଫୁଟବଲ ଓ ଆରଚେରୀ ଦୁଇଟି ଖେଳ ଅନୁଷ୍ଠିତ ହେବ। ୧୮ ଜିଲାରୁ ୩୫୦ରୁ ଊର୍ଦ୍ଧ୍ବ ପ୍ରତିଯୋଗୀ ବାଳକ ବାଳିକାମାନେ ଅଂଶଗ୍ରହଣ କରିବେ।
ସଂଘ ସମ୍ପାଦକ ଚନ୍ଦ୍ରକାନ୍ତ ନାଥଙ୍କ ମତରେ, ବନରେ ରହୁଥିବା ଆଦିବାସୀମାନଙ୍କ ଶିକ୍ଷା, ସ୍ୱାସ୍ଥ୍ୟ, କୃଷି, ଆର୍ଥିକ ବିକାଶ, ସାମ୍ବିଧାନିକ ଅଧିକାର, କ୍ରୀଡ଼ା ବିକାଶ କ୍ଷେତ୍ରରେ ବନବାସୀ ଆଶ୍ରମ ସ୍ଥାପନ କରାଯାଇଥିଲା। ସଂଘ ପକ୍ଷରୁ ଓଡ଼ିଶାରେ ଏକାଧିକ ଛାତ୍ରାବାସ, ପାଠଶାଳା, ସ୍ୱାସ୍ଥ୍ୟକେନ୍ଦ୍ର ଓ କ୍ରୀଡ଼ାକେନ୍ଦ୍ର ରହିଛି। ଗଣଶିକ୍ଷା ଅନୁସୂଚିତ ଜାତି ଓ ବନଜାତି ଉନ୍ନୟନ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ଜନଜାତି ଖେଳକୁଦ ପ୍ରତିଯୋଗିତାକୁ ଉଦଘାଟନ କରିବାର କାର୍ଯ୍ୟକ୍ରମ ରହିଛି। ବିଧାୟକ ଗୌରୀଶଙ୍କର ମାଝୀ ଓ ପିତାମ୍ବର ଆଚାର୍ଯ୍ୟ ଅତିଥି ଭାବରେ ଯୋଗ ଦେବାର କାର୍ଯ୍ୟକ୍ରମ ରହିଥିବା ବନବାସୀ କଲ୍ୟାଣ ଆଶ୍ରମ ପକ୍ଷରୁ ଆଜି ଆୟୋଜିତ ସାମ୍ବାଦିକ ସମ୍ମିଳନୀରେ ଏହି ଖେଳକୁଦ ପ୍ରତିଯୋଗିତା ସମ୍ପର୍କରେ ସୂଚନା ଦିଆଯାଇଛି।
