ଖୁବଶୀଘ୍ର ଆସୁଛି ଭାରତର ପରବର୍ତ୍ତୀ ଘଣ୍ଟା ପ୍ରତି ୨୮୦ କିମି ବେଷ୍ଟ-ଇନ୍-କ୍ଲାସ୍ ଫିଚର ହାଇସ୍ପିଡ୍ ଟ୍ରେନ୍

ଡେସ୍କ: ଚେନ୍ନାଇସ୍ଥିତ ଇଣ୍ଟିଗ୍ରାଲ୍ କୋଚ୍ ଫ୍ୟାକ୍ଟ୍ରି ବିଇଏମ୍ଏଲ୍ ସହଯୋଗରେ ହାଇସ୍ପିଡ୍ ଟ୍ରେନ୍ ସେଟ୍ ଡିଜାଇନ୍ ଓ ଉତ୍ପାଦନ କରୁଛି, ଯାହାର ଡିଜାଇନ୍ ସ୍ପିଡ୍ ଘଣ୍ଟା ପ୍ରତି ୨୮୦ କିଲୋମିଟର ରହିବ ବୋଲି ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ବୁଧବାର ସଂସଦରେ କହିଛନ୍ତି। ଲୋକସଭାରେ ଏକ ପ୍ରଶ୍ନର ଲିଖିତ ଉତ୍ତରରେ ବୈଷ୍ଣବ କହିଛନ୍ତି ଯେ ମେକ୍ ଇନ୍ ଇଣ୍ଡିଆ ଅଭିଯାନ ଅଧୀନରେ ବନ୍ଦେ ଭାରତ ଟ୍ରେନର ସଫଳତା ପରେ ଭାରତୀୟ ରେଳବାଇ ଏବେ ହାଇସ୍ପିଡ୍ ଟ୍ରେନ୍ ସେଟର ଡିଜାଇନ୍ ଏବଂ ଉତ୍ପାଦନ ଆରମ୍ଭ କରିଛି।

ବିଜେପି ସାଂସଦ ସୁଧୀର ଗୁପ୍ତା ଓ ଅନନ୍ତ ନାୟକଙ୍କ ପ୍ରଶ୍ନର ଉତ୍ତର ଦେଇ ସେ କହିଛନ୍ତି, ଟିକସକୁ ବାଦ୍ ଦେଇ କାର ପିଛା ଉତ୍ପାଦନ ଖର୍ଚ୍ଚ ପ୍ରାୟ ୨୮ କୋଟି ଟଙ୍କା ଯାହା ଅନ୍ୟ ଟ୍ରେନ୍ ସେଟ୍ ତୁଳନାରେ ଅତ୍ୟନ୍ତ ପ୍ରତିଦ୍ୱନ୍ଦ୍ୱିତାପୂର୍ଣ୍ଣ। ହାଇସ୍ପିଡ୍ ଟ୍ରେନ୍ ସେଟର ଡିଜାଇନ୍ ଏବଂ ଉତ୍ପାଦନ ଏକ ଜଟିଳ ଏବଂ ବୈଷୟିକ ଜ୍ଞାନକୌଶଳ ଭିତ୍ତିକ ପ୍ରକ୍ରିୟା ବୋଲି ମନ୍ତ୍ରୀ କହିଛନ୍ତି।

ଏଥିସହ ଏରୋଡାଇନାମିକ, ଏୟାରଟାଇଟ୍ କାର୍ ବଡିର ଡିଜାଇନ୍ ଓ ଉତ୍ପାଦନ, ହାଇସ୍ପିଡ୍ ଆପ୍ଲିକେସନ୍ ପାଇଁ ପ୍ରୋପଲସନ୍ ସମେତ ଇଲେକ୍ଟ୍ରିକର ଡିଜାଇନ୍ ଓ ଉତ୍ପାଦନ, ଟ୍ରେନ୍ ସେଟର ଓଜନ ଅପ୍ଟିମାଇଜେସନ୍ ଏବଂ ଟ୍ରେନ ହିଟିଂ, ଭେଣ୍ଟିଲେସନ୍ ଓ ଏୟାର କଣ୍ଡିସନିଂ ଆଦି ପ୍ରମୁଖ ବୈଷୟିକ ଦିଗ ଉପରେ ସେ ଆଲୋକପାତ କରିଥିଲେ।

ଟ୍ରେନ୍ ସେଟରେ ସର୍ବୋତ୍ତମ ବୈଶିଷ୍ଟ୍ୟ ଥିବା ଚେୟାର କାର୍ ରହିବ, ଯେପରିକି ଏରୋଡାଇନାମିକ୍ ବାହ୍ୟ, ସିଲ୍ ହୋଇଥିବା ଗ୍ୟାଙ୍ଗ୍ ୱେ, ସ୍ୱୟଂଚାଳିତ କବାଟ, କମ୍ପାର୍ଟମେଣ୍ଟ ଭିତରେ ସର୍ବୋତ୍ତମ ଜଳବାୟୁ ପରିସ୍ଥିତି।

ବିସ୍ତୃତ ଡିଜାଇନ୍ ଚୂଡ଼ାନ୍ତ ହେବା ପରେ ପ୍ରକଳ୍ପର ସମ୍ପୂର୍ଣ୍ଣତା ଯଥେଷ୍ଟ ଭାବେ ନିର୍ଦ୍ଧାରଣ କରାଯାଇପାରିବ ବୋଲି ସେ କହିଛନ୍ତି।
ଜାପାନର ବୈଷୟିକ ଓ ଆର୍ଥିକ ସହାୟତାରେ କାର୍ଯ୍ୟକାରୀ ହେଉଥିବା ମୁମ୍ବାଇ-ଅହମ୍ମଦାବାଦ ହାଇସ୍ପିଡ୍ ରେଳ ପ୍ରକଳ୍ପ ସମ୍ପର୍କରେ ମନ୍ତ୍ରୀ ସୂଚନା ପ୍ରଦାନ କରିବା ସହ ଏପର୍ଯ୍ୟନ୍ତ ୩୩୬ କିଲୋମିଟର ପିୟର ଫାଉଣ୍ଡେସନ, ୩୩୧ କିଲୋମିଟର ପିଅର୍ ନିର୍ମାଣ, ୨୬୦ କିଲୋମିଟର ଗାର୍ଡର କାଷ୍ଟିଂ ଏବଂ ୨୨୫ କିଲୋମିଟର ଗାର୍ଡର ଲଞ୍ଚିଂ ଶେଷ ହୋଇଛି ବୋଲି କହିଛନ୍ତି।

ସମୁଦ୍ର ତଳେ ପ୍ରାୟ ୨୧ କିଲୋମିଟର ସୁଡ଼ଙ୍ଗ କାମ ମଧ୍ୟ ଆରମ୍ଭ ହୋଇଛି। ୫୦୮ କିଲୋମିଟର ଦୀର୍ଘ ଏମ୍ଏଏଚ୍ଏସ୍ଆର ପ୍ରକଳ୍ପରେ ମୁମ୍ବାଇ, ଥାନେ, ବିରାର, ବୋଇସର, ବାପି, ବିଲିମୋରା, ସୁରଟ, ଭରୁଚ, ଭଦୋଦରା, ଆନନ୍ଦ, ଅହମ୍ମଦାବାଦ ଏବଂ ସାବରମତୀରେ ୧୨ଟି ଷ୍ଟେସନ୍ ରହିବ ଏବଂ ଏଥିପାଇଁ ଆବଶ୍ୟକ ୧,୩୮୯.୫ ହେକ୍ଟର ଜମି ଅଧିଗ୍ରହଣ କରାଯାଇଛି ବୋଲି ରେଳମନ୍ତ୍ରୀ କହିଛନ୍ତି।