ପୁରୀ: ସେବାୟତଙ୍କୁ ପୁଲିସର ମାଡ଼ ଘଟଣାର ପ୍ରତିବାଦରେ ସେବାୟତଙ୍କ ପକ୍ଷରୁ ଆରମ୍ଭ ହୋଇଥିବା ଅସହଯୋଗ କାରଣରୁ ଶ୍ରୀମନ୍ଦିରରେ ଦ୍ବିତୀୟ ଦିନ ପାଇଁ ନୀତିକାନ୍ତି ବନ୍ଦ ରହିଛି। ସିଂହଦ୍ବାର ଖୋଲି ନଥିବାରୁ ହଜାର ହଜାର ଭକ୍ତ ଦୀର୍ଘ ସମୟ ଧରି ଅପେକ୍ଷା କରିଛନ୍ତି। ଆଲୋଚନା ମାଧ୍ୟମରେ ବିବାଦର ସମାଧାନ ପାଇଁ ସେବାୟତଙ୍କୁ ଜିଲା ପ୍ରଶାସନ ଶୁକ୍ରବାର ଏକ ବୈଠକ ଡାକିଥିଲେ। କିନ୍ତୁ ସେବାୟତମାନେ ନିଜ ଜିଦରେ ଅଟଳ ରହିବାରୁ ସମାଧାନର ବାଟ ବାହାରିପାରିନ ଥିବା ଜିଲାପାଳ ସୂଚନା ଦେଇଛନ୍ତି। ଅପରପକ୍ଷରେ ସେବାୟତମାନେ ନିଜ ବିବେକ ଅନୁଯାୟୀ ପଦକ୍ଷେପ ନେବାକୁ ଶ୍ରୀମନ୍ଦିର ମୁଖ୍ୟ ପ୍ରଶାସକ ପ୍ରଦୀପ କୁମାର ମହାପାତ୍ର ଆହ୍ବାନ ଦେଇଛନ୍ତି। ସୂଚନାଯୋଗ୍ୟ, ୨୦୧୨ରେ ମଧ୍ୟ ଅନୁରୂପ ଘଟଣା ଯୋଗୁଁ ଶ୍ରୀମନ୍ଦିରର ନୀତିକାନ୍ତି ବନ୍ଦ ରହିଥିଲା।
ସୂଚନାଯୋଗ୍ୟ, କେତେକ ଭକ୍ତଙ୍କୁ ବେଆଇନ୍ ଭାବେ ଭିତରଚ୍ଛ ଭବାନୀ ଶଙ୍କର ମହାପାତ୍ର ଶ୍ରୀମନ୍ଦିର ଭିତରକୁ ନେବାକୁ ଉଦ୍ୟମ କରୁଥିବା ବେଳେ କାର୍ଯ୍ୟରତ ବିଶ୍ବଜିତ ପରିଜା ବାଧା ଦେଇଥିଲେ। ଏହାକୁ ନେଇ ବିବାଦର ସୂତ୍ରପାତ ହୋଇଥିଲା। ପୁଲିସ କନଷ୍ଟେବଳଙ୍କ ମାଡ଼ରେ ସେବାୟତ ଆହତ ହୋଇଥିବା ଅଭିଯୋଗ ଆସିଛି। ଶ୍ରୀପରିଜାଙ୍କୁ ଗିରଫ ଓ ନିଲମ୍ବନ ଦାବିରେ ସେବାୟତମାନେ ଅଡ଼ି ବସିଛନ୍ତି। ଏଥିଯୋଗୁଁ ମହାପ୍ରଭୁଙ୍କ ନୀତିକାନ୍ତି ଅନୁଷ୍ଠିତ ହୋଇପାରିନାହିଁ। ଅପରପକ୍ଷରେ ଶ୍ରୀ ପରିଜା ଶ୍ରୀ ମହାପାତ୍ରଙ୍କ ନାମରେ ସିଂହଦ୍ବାର ଥାନାରେ ଏତଲା ଦେଇଛନ୍ତି।
