ବେଙ୍ଗାଲୁରୁ : କର୍ଣ୍ଣାଟକ ଚମରାଜନଗର ଜିଲା କେଲ୍ଲେଗଲ ତହସିଲ ଅଧୀନ ସୁଲୱାଡି ଗ୍ରାମରେ ଏକ ମନ୍ଦିରର ପ୍ରସାଦ ଖାଇ ୧୫ ଲୋକଙ୍କ ମୃତ୍ୟୁ ହେବା ଘଟଣାରେ ପୁଲିସ୍ ବୁଧବାର ୪ ଜଣଙ୍କୁ ଗିରଫ କରିଛି। ପୁଲିସ୍ ପକ୍ଷରୁ କୁହାଯାଇଛି ଯେ ମନ୍ଦିର ଟ୍ରଷ୍ଟିକୁ ଗାଦିଚ୍ୟୁତ୍ କରିବା ଓ ମନ୍ଦିରର ଦାନ ଅର୍ଥକୁ ହଡ଼ପ କରିବା ଲକ୍ଷ୍ୟରେ ମଠାଧୀଶ ପ୍ରସାଦରେ ବିଷ ମିଶାଇଥିଲେ।
ସଲୁର ମଠର ମଠାଧୀଶଙ୍କ ନିର୍ଦେଶରେ ତାଙ୍କ ପ୍ରେମିକା, ପ୍ରେମିକାଙ୍କ ସ୍ୱାମୀ ଏବଂ ନିକଟ ଏକ ମନ୍ଦିରର ପୂଜାରୀ ଡିସେମ୍ବର ୧୪ ତାରିଖ ଦିନ ମନ୍ଦିରରେ ପ୍ରସ୍ତୁତ ପ୍ରସାଦରେ ବିଷ ମିଶାଇଥିଲେ। ଏହି ବିଷମିଶା ପ୍ରସାଦ ସେବନ କରି ୧୫ ଜଣଙ୍କ ମୃତ୍ୟୁ ଘଟିଥିଲା ଓ ୧୦୦ରୁ ଊର୍ଦ୍ଧ୍ବ ଲୋକ ଗୁରୁତର ଭାବେ ଅସୁସ୍ଥ ହୋଇ ପଡ଼ିଥିଲେ। ପୁଲିସ୍ ଏହି ଷଡ଼ଯନ୍ତ୍ରର ପର୍ଦ୍ଦାଫାସ୍ କରିବା ପୂର୍ବକ ବୁଧବାର ମଠାଧୀଶ ଏବଂ ତାଙ୍କ ୩ ସହଯୋଗୀଙ୍କୁ ଗିରଫ କରିଛି। ଏହି ଘଟଣାର ତଦନ୍ତ ପାଇଁ ଏକ ୪୫ ଜଣିଆ ପୁଲିସ୍ କର୍ମୀଙ୍କ ଦଳ ଗଠନ କରାଯାଇଥିଲା । ପୁଲିସ୍ ଦଳ ଆଖପାଖ ଅଞ୍ଚଳର ଲୋକ, ମନ୍ଦିରକୁ ପ୍ରତିଦିନ ଆସୁଥିବା ଭକ୍ତ ଏବଂ ପ୍ରସାଦ ଖାଇ ଅସୁସ୍ଥ ହୋଇପଡ଼ିଥିବା ଲୋକଙ୍କୁ ପଚରାଉଚୁରା କରି ଘଟଣାର ପର୍ଦ୍ଦାଫାସ କରିବାରେ ସଫଳ ହୋଇଛି । ପୁଲିସ୍ ପ୍ରସାନ୍ଦ ରାନ୍ଧିଥିବା ମଠାଧୀଶଙ୍କ ପ୍ରେମିକା ଅମ୍ବିକାକୁ ସନ୍ଦେହରେ ଅଟକ ରଖି ପଚରାଉଚୁରା କରିବା ପରେ ସେ ଖାଦ୍ୟରେ ବିଷ ମିଶାଇଥିବା ସ୍ୱୀକାର କରିଛି। ମଠାଧୀଶଙ୍କ ନିର୍ଦେଶରେ ସେ ଏହି କାର୍ଯ୍ୟ କରିଥିବା କହିଛି। ଅମ୍ବିକା ଘରୁ ଦୁଇଟି କୀଟନାଶକ ଔଷଧ ବୋତଲ ଜବତ କରାଯାଇଛି।
