ଭୁବନେଶ୍ୱର: ପ୍ରାଥମିକ ଶିକ୍ଷକଙ୍କୁ ଲୋୟର ପିଏମଜିରେ ଆନ୍ଦୋଳନ କରିବାକୁ ଅନୁମତି ନଳିବାରୁ ମୁହଁରେ କଳାପଟି ବାନ୍ଧି ଆନ୍ଦୋଳନ କରିଛନ୍ତି ପ୍ରାଥମିକ ଶିକ୍ଷକ ସଂଘ । ଅନୁମତି ନଦେଇଥିବାରୁ ସଂଘ ପକ୍ଷରୁ କମିଶନରେଟ ପୋଲିସକୁ ତୀବ୍ର ସମାଲୋଚନା ଓ ନିନ୍ଦା କରାଯାଇଛି । ସମସ୍ତ ନାଗରିକଙ୍କ ଆନ୍ଦୋଳନ କରିବା ପାଇଁ ସାମ୍ବିଧାନିକ ଅଧିକାର ରହିଥିବା ବେଳେ ପ୍ରାଥମିକ ଶିକ୍ଷକ ମାନଙ୍କୁ କାହିଁକି ଅନୁମତି ଦିଆଯାଉନାହିଁ । ଏହା ଅସାମ୍ବିଧାନିକ ଓ ଅଗଣତାନ୍ତ୍ରିକ ବୋଲି ସଂଘ କହିଛି ।
ଦାବି ପୂରଣ ପାଇଁ ଏକ ଅଭିନବ ଉପାୟରେ ପାଟିରେ କଳାପଟି ବାନ୍ଧି ଶାନ୍ତିପୂର୍ଣ୍ଣ ଭାବରେ ଲୋୟର ପିଏମଜିରେ ବହୁ ସଂଖ୍ୟାରେ ପ୍ରାଥମିକ ଶିକ୍ଷକ ମାନେ ଏକାଠି ହୋଇଥିଲେ । ଅନେକ ଥର ଆନ୍ଦୋଳନ କରିବା ସତ୍ୱେ ସରକାର ସେମାନଙ୍କ ଦାବି ପୂରଣ କରିନଥିବା ଅଭିଯୋଗ ହୋଇଛି । ମୁଖ୍ୟ ଶାସନ ସଚିବ ଲିଖିତ ପ୍ରତିଶ୍ରୁତି ଦେବା ପରେ ମଧ୍ୟ ଆଜି ପର୍ଯ୍ୟନ୍ତ ଦାବି ପୂରଣ ହୋଇନାହିଁ । ସବୁ ବିଭାଗରୁ ଠିକା ନିଯୁକ୍ତି ଉଠିଥିଲା ବେଳେ ପ୍ରାଥମିକ ଶିକ୍ଷାରୁ ଠିକା ନିଯୁକ୍ତି ଉଠିଲା ନାହିଁ କିମ୍ବା ୨୦୧୮ରୁ ୨୦୨୩ ମଧ୍ୟରେ ନିଯୁକ୍ତି ହୋଇଥିବା କନିଷ୍ଠ ଶିକ୍ଷକଙ୍କୁ ନିୟମିତ କରାଗଲା ନାହିଁ । ଉଚ୍ଚ ନ୍ୟାୟାଳୟ ସମାନ କାମକୁ ସମାନ ଦରମା ଦେବାକୁ ନିର୍ଦ୍ଦେଶ ଦେଇଥିବା ବେଳେ ରାଜ୍ୟ ସରକାର ଏହାକୁ କାର୍ଯ୍ୟକାରୀ କରୁନାହାଁନ୍ତି ବୋଲି ଶିକ୍ଷକ ସଂଘ ଅଭିଯୋଗ କରିଛି । ଏଭଳି ଅନେକ ଦାବି ପ୍ରାଥମିକ ଶିକ୍ଷକ ସଂଘ ସରକାରଙ୍କ ନିକଟରେ ରଖିଛି । ତୁରନ୍ତ ଦାବି ପୂରଣ ନହେଲେ ଆନ୍ଦୋଳନକୁ ତୀବ୍ରତର କରାଯିବ ବୋଲି ସଂଘର ସଭାପତି କହିଛନ୍ତି ।
