ହରଭଙ୍ଗା: ବୌଦ୍ଧଜିଲ୍ଲା ହରଭଙ୍ଗା ଥାନା ଅର୍ନ୍ତଗତ କୁଶଙ୍ଗ-ଛତ୍ରଙ୍ଗ ପୂର୍ତବିଭାଗ ରାସ୍ତାର ଅଯୋଧ୍ୟା ନିକଟରୁ ହରଭଙ୍ଗା ପୁଲିସ ଚଢଉ କରି ୨ଟି ବାଇକରୁ ୧୨କେ.ଜି ଓଜନର ଗଞେଇ ଜବତ କରିଥିବା ଜଣାପଡ଼ିଛି। ଏହି ଘଟଣାରେ ୨ଜଣ ମହିଳା ଚାନ୍ଦିନୀ ନାଏକ (୪୫) ଓ ତିଳୋତମା ନାଏକ (୩୨) ଏବଂ ୨ଜଣ ପୁରୁଷ ଶ୍ରୀକାନ୍ତ ନାଏକ (୨୬) ଏବଂ ସମୀନା ବେହେରା (୧୯)ଙ୍କୁ ଗିରଫ କରିଥିବା ଜଣାପଡ଼ିଛି।
ପୁଲିସ୍ ସୁତ୍ରରୁ ମିଳିଥିବା ସୂଚନା ଅନୁସାରେ କନ୍ଧମାଳ ଜିଲ୍ଲାରୁ ଚାରିଛକ–କୁଶଙ୍ଗ ରାସ୍ତା ଦେଇ ଗଣିଆ ଅଂଚଳକୁ ଗଞେଇ ଚୋରା ଚାଲାଣ ହେଉଥିବା ପୁଲିସ ବିଶେଷ ସୂତ୍ରରୁ ଖବର ପାଇଥିଲା। ଖବର ମୁତାବକ ପୁଲିସ ପୂର୍ତରାସ୍ତାର ଅଯୋଧ୍ୟା ନିକଟରେ ଛକିରହି ଗଞେଇ ଚାଲାଣରେ ବ୍ୟବହୃତ ୨ଟି ଗାଡିକୁ ଅଟକାଇ ଯାଂଚ କରିଥିଲା। ଦୁଇ ଗାଡିରୁ ୧୨କେ.ଜି ଓଜନର ଗଞେଇ ବ୍ୟାଗ ମିଳଥିଲା। ଏହି ଘଟଣାରେ ପୁଲିସ କୁଶଙ୍ଗ ଗେରେଡି ସାହିର ସମୀନା ବେହେରାଙ୍କୁ ଗିରଫ କରିଥିବା ବେଳେ ଗଣିଆ ଥାନା ଅର୍ନ୍ତଗତ ଲୁଇସିଂର ଚାନ୍ଦିନୀ ନାଏକ, ତିଳୋତମା ନାଏକ ଏବଂ ବାଙ୍କଝୁଲିର ଶ୍ରୀକାନ୍ତ ନାଏକଙ୍କୁ ଗିରଫ କରିଛି। ଏ ନେଇ ହରଭଙ୍ଗା ଥାନାରେ ଏକ ଏନ.ଡି.ପି.ଏସ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ହରଭଙ୍ଗା ଥାନାଧିକାରୀ ପୁଷ୍ପଲତା ରାଉତରାୟ ସୂଚନା ଦେଇଛନ୍ତି।
